Kynnoh ka KSU ba trei torti ka Dhar Construction ïa ka surok Two Lane na Nongjri-Khonjoy

Mawkyrwat, Risaw, 25: Ka Khasi Students Union (KSU) Langkynma Area Unit ha ka sngi Thohdieng ka la hiar jurip ïa ka surok Nonghyllam sha Khonjoy ba la pyntrei da ka M/s Dhar Constructions bad lap ba ka jingpyntrei ïa kane ka surok Two Lane ka la long torti palat.
Hadien ka jingjurip, u President ka seng u Bah Ioannis Hashah haba kren sha ki lad pathai khubor u la pynpaw ka jingsngewsih namar ka jingtrei torti palat jong ka kompeni kaba shna ïa ka surok Nonghyllam – Khonjoy namar ïa mynta la sakhi ba ka jingiaid ki kali heh ym pat shym la iohi ïa kiwei ki kali kiba iaid, lait tang ki kali jong ka kompen kiba ki ju kit ïa ki tiar ki tar jong ki hi.
“Dang tang mynta 5 ne 6 bnai ki la siang rong ïa kane ka surok hynrei kaba sngewsih ka long ba kane ka surok ka la jot la pra”, ong u bah Hahshah bad kyrpad ïa ka kompeni ban trei bha bad lada kam lah ban leh kumba la pynsngew kum ka seng kan sa leh da kaba tyngeh.
Ha kajuh ka por kum ka seng ka la phah ruh ïa ka khubor sha u Myntri Rangbah jong ka Jylla u Conrad Sangma ba u dei ban leh eiei halor kane kam namar haba wanrah ïa ka roi ka par lyngba ka surok kan long ka jingbha lang ïa baroh bad khamtam eh kane ka surok kan sa pynïasoh ïa ka Khasi Hills bad ka Garo Hills lyngba ka leit ka wan kaba suk.
Ka Seng ka la phah ruh ïa u kyrwoh sha ki Consultant, ki Engineer jong ka NHDICL ba haba ki wan ban trei ne peit ïa ka surok kim dei ban shu shim stieng hynrei ki dei ban shimkhia khnang ba ka kam kan long kaba bniah.