Nongpoh, Risaw 25: Kumba ju leh man u snem, ban ai mynsiem bad ban pynshlur ïa ki samla pule ka dong Ri Bhoi kiba la pas bha ha ka eksamin SSLC bad HSSLC mynta u snem, ka Ri Bhoi Youth Federation (RBYF) mynta ka kynti ka la shim biang ïa kasienjam ban pynkup burom bad ai da ki khusnam sha ki samla pule na Ri-Bhoi kiba la pass bha bad wan shakhmat ha katei ka examination.
Ïa kane ka jingpynkup burom bad sam khusnam la pynlong ha ophis treikam jong ka RBYF ha Saiden ha kaba u Bah M Marbaniang Director ka MBOSE u la wan ban shim bynta kum u kongsan, u Bah Raju Rizal SDSEO ka Ri Bhoi kum u symbud kongsan, ha ka jingdonlang u Bah Rayonald Kharkamni President ka RBDCA, u Bah Everlasting Pyngrope Principal ka Mynken Christian Higher Secondary School, u Bah Bipul Thangkhiew President ka RBYF, Bah Bullet Marbaniang Secretary, ki dkhot ka RBYF na ka sengkmie, ki circle bad ki unit bapher bapher.
La pynphuh pynphieng ruh ha kane ka sngi ba ka RBYF ka pynkup burom bad sam khusnam sha kitei ki samla pule da ka jingdon lang ki 15 ngut ki samla ba pass bha ha ka HSSLC bad 10 ngut na ka SSLC ryngkat ki kmie ki kpa bad ki nonghikai jong kitei ki khynnah skul, bad na ka liang ka seng ka la sam ruh da ka mementoes bad pisa sha kitei ki khun samla ba la wan shakhmat ha ka jingpule.
Nalor kitei ki samla pule, na ka liang ka RBYF ka la sam ruh ïa kakhusnam ba kyrpang sha 3 tylli ki skul na Ri Bhoi kiba la leit ban mihkhmat ïa kajylla Meghalaya sha ka International Subroto Cup Football Tournament 2024 ba kynthup ïa kaChristian Higher Secondary School, Mynken Christian Higher Secondary School bad ka Nongjri Presbyterian Higher Secondary School kaba la rah ïa kanam lahduh ha ka U-15 ki shynrang, kumjuh ruh ïa u Bah Everlasting Pyngrope u ba la ioh pdiang ïa kaNational Teachers Award 2024 bad u Bah Rayonald Kharkamni u ba la shah jied ruh kum u Match Observer ka jinglehkai test kriket ka India bad New Zealand ban long ha Mumbai.
Haba kren ha katei ka sngi na ka liang u Bah Bipul Thangkhiew kum u President ba rangbah la seng u la ong ba kum ka seng ka la sdang ïa kane ka jingsam khusnam sha ki samla pule naduh u snem 2008 kum kawei na ki thong jong ka seng ban ai mynsiem bad ban pynshlur ïa ki samla pule na ka them Ri-Bhoi ba kin minot bad kiew shaphrang ha ka jingpule. U la ïathuh ruh ba ka seng ka ju ai da ka baibam kaba T.500/- shi bnai sha kito ki samla kiba rung ha ka top 20 na Ri-Bhoi District ha ka eksamin SSLC bad HSSLC hynrei sngewsih bad mynta u snem ym don satia ba rung ha katei ka thup bad kyrmen ba ha ki snem ban wan kin mih ki samla pule ki ban poi ha katei ka thup ban wanrah ka nam bad ka burom ïa ki kmie ki kpa ka iing ka sem bad ka district baroh kawei.
U la ong ruh ba na ka liang ka seng ka don ruh ka thong ban buh da ka prokram ai jinghikai (Coaching Class) sha ki samla pule kiba pynkhreh ïa kaNEET exam namar kum ka seng ka kwah ba ki samla pule kin kiew shaphrang ha ka jingpule jong ki watla ka seng kam lah ban kyrshan da ka bor pisa hynrei ka don pat ka jingangnud ban ai mynsiem ïa ki bad ban pynioh ïa ki jaka pule kiba biang na ka bynta ki samla kiba wan shakhmat na ka bynta ban pynmih shibun ki riew shlur bad ki riew khraw kiban ai pat ka jingshakri bad ruh ban kyntiew ïa ka bha ka miat bad ka roi ka par jong ka dong Ri Bhoi hadien ba ki la biang kam biang jam bad poi sha ki kyrdan kiba shaneng.
Na ka liang u Bah M Marbaniang Director ka MBOSE haba kren ha katei ka sngi kum u kongsan u la ai ka jingïaroh ïa kaseng RBYF nalor kiwei kiwei ki jingshakri ha ka imlang ka sahlang ka la shim ruh ïa katei ka sienjam ban ai khusnam ïa ki samla pule kum ka jingpynshlur ba kin kiew shaphrang ha ka jingpule namar ka jingnang jingstad ha kane ka juk ba mynta ka dei ka bor ba khlaiñ bad kum uwei u heh ophisar u ai ka jingkyrshan ïa kaseng halor katei ka kam ba khraw ba ki leh.
U la ong ruh ba kum ki samla ki dei ban shim ïa kakabu hadien ba ka seng ka la thmu ban buh da ka coaching class na ka bynta ki samla pule kiba pynkhreh ïa kaNEET exam bad kiwei kiwei ki eksam ha ka jingïatreilang bad kawei ka kynhun na nongbah Delhi bad kane ka dei shisha ka kam ba khraw ba kum ka seng ka la leh na ka bynta ban kyntiew ïa ki khun samla jong ka dong Ri-Bhoi bad kyrmen skhem lyngba ka jingshimkhia jong ka seng kin mih ki khraw pyrkhat bad ki heh ophisar ha ka district bad ka jylla baroh kawei ki ban shim ïa kabynta ha ki tnad sorkar bapher bapher.
