Nongstoiñ, Ïaïong, 08: Namar ka jingbym biang jong ka rukom sumar ïa kiba pang ba shitom ha Civil Hospital Nongstoiñ, ki nongïalam ka Hynñiewtrep Youth Council Nongstoiñ circle ha kane ka lah sngi u Blei, ki la leit ban ïakynduh ïa ka District Medical & Health Officer jong ka West Khasi Hills, ban kyrpad ïa ka ban tuklar lem bad ban bthah ïa ki Doktor, ki Nurse bad kiwei kiwei ki nongtrei hapoh katei ka jaka sumar, ba ki dei ban shimkhia ïa ka kamram ba la bynshet ha ki.
U bah Reddy Fernandy Sun president ka seng haba ïakren bad u nongthoh khubor hadien ba ki la mih na ka kamra trei kam jong ka DM&HO, u la ong ba ka jingleit ïakynduh jong ki ïa katei ka Officer jong ka tnad ka koit ka khiah, ka dei hadien ba ka don kawei ka longkmie kaba leit kha khunlung ha katei ka hospital.
La ong ba hadien ba ka la mih na katei ka jaka sumar, kam shym la sngew thikna ïa ka jingkoit jingkhiah namar ka jingthud ha ka met ka phad jong ka. Kumta hadien katto katne sngi katei ka longkmie ka la ïoh ban sei pynban da I lyngkhot jaiñ na ka jaka ba ki doctor ki suh ïa ka bynta jong ka met jong ka.
Utei u nongïalam ka seng u la ong ruh ba ka seng, ka la ïoh ruh ïa ka jingujor na ki paitbah kiba leit phah sumar ha katei ka Hospital, ba teng teng ki nongtrei kum ki doctor bad ki nurse ki ju kren tohmet ïa ki nongpang, kaba la pynlong ïa ki ba kim sngew tynnad satia.
Ha kane ka sngi ki la mut ban leit ïakynduh ruh ïa u Doktor Sohkhlet u ba dei u Medical Superintendent, hynrei um shym la don satia kumta kin sa leit ban ïakynduh pat ha kawei ka sngi. Ha kajuh ka por u la ong ba ha ka jingleit ïakynduh ïa ka DM&HO ki la aiti ruh da ka jingthoh khnang ba kan pynsngewthuh ïa baroh ki nongtrei ha Civil Hospital.
