Shillong, Ïaiong 08 : Ka North East Centre for Technology Application and Reach (NECTAR), Cotton University bad ka St Anthony’s College Shillong, ki la pynlong da ka rynsan ai jinghikai halor ka phang “Mobile Campus-Based Geospatial Training Programme on GIS and Remote Sensing” na bynta ki samla pule final year BSc major jong ka Department of Geology, St. Anthony’s College, Shillong.
Ha ka jingïalang plie kaba long ha kane ka 08tarik ha Noel Conference Hall, St. Anthony’s College, Shillong, la wan ban donlang naduh u Director General, NECTAR, Dr. Arun Kumar Sarma, bad ki heh sorkar na katei ka tnad treikam ba kynthup ïa u Rajendra Jena, Dr. Collin Z Renthlei, Sattyam Tripathi, Roshni Rai bad Nikita Gogoi.
Ka jingïalang ka la sdang da ka jingkren pdiang sngewbha na i Dr. V.J.J. Wallang, HoD, Department of Geology, bud sa ka jingkren plie na u Rev. Fr. Dr. Arcadius Puwein SDB.
Ha ka jingkren maitphang na u Rajendra Jena, u la pynshai halor ka jingthmu bad ka jingdonkam jong ka jingtbit halor ka jingpyndonkam ïa ki kor ki bor ba ïadei bad ka jinglong ki sawdong sawkun ne kita ki geospatial technologies lyngba ki jinghikai ba tyrwa da ka NECTAR kaba tip kum ka mobile campus-based geospatial training program.
Na ka lïang u Dr. Arun Kumar Sarma pat ha ka jingkren bniah u la batai kumno ba kine ki prokram ki plei lad ym tang ban pynïar ia ka jingmut jingpyrkhat bad ruh ha ka kam hynrei ka wanrah ruh ka mynsiem treilang hapdeng kiba trei lang. U ong ruh ba kane kan pynlong ïa ki ban pynkhreh na ka bynta ki jingïakhun kiba shisha ha ka pyrthei. Ïa ka jingkhublei pynwai ha kane ka prokram la ïoh na ka Nisha Chettri.
