Shillong, Ïaïong 08: U Myntri Rangbah ka jylla u Conrad K Sangma ha ka sngi baar u la ong ba ka sorkar ka dang iakren bad ka sorkar pdeng ha kaba ïadei bad ki jingïaid beit ki rukom treikam hapoh ka North Eastern Hill University (NEHU).
“Nga dang ïakren bad ka sorkar India. Nga dang ïakren bad u Myntri ka tnat pule puthi na ka por sha ka por bad ban kyrpad ïa u ban wad ki lad ki lynti ban pynbeit ïa kane ka kam. Ki la leh katba lah ban leh ïa kaba bha tam bad nga ïathuh ruh ba ki lah ban don ki jyrwit jyrwat hynrei ngi donkam ban ïatreilang na ka bynta ka bha ka miat ki samla pule,” ïathuh u Sangma sha ki lad pathai khubor.
Ha kaba ïadei bad ka jingpyrshah ïa u vice chancellor jong ka university, u Myntri Rangbah u la ong, “Ngi sngewkhia shaphang kane ka jingeh kaba ïadei bad ka NEHU bad nga da sngewkhia shaphang ka jingeh ki samla pule. Ki don ki kam na baroh ki liang bad ngi pyrshang ruh ban sngewthuh bad ngi kwah ruh ban pynbeit la ka dei na ka liang ka sorkar bad ki riewshemphang bad ngin pyrshang ban pyndep bad ban pynbeit kloi ïa kane ka jingeh kaba don ha NEHU khnang ban wanrah ïa ki rukom treikam kiba biang ha kane ka skulbah.”
“Ka NEHU ka dei ka autonomous body bad ki jingtreikam jong ka ki dei beit na ka Education Ministry. Namar kata ki jingeh ki don naba ka sorkar jylla kam lah ban leh hi ïa kane ka kam ne ban tuklar. Ngi dap shisha da ka jingsngewkhia hynrei ka long pat kaba eh ba ngim lah ban tuklar,” u la ong.
U Myntri Rangbah u la ong, “Dalade hi shimet nga la leit ban kynduh ïa ki samla pule halor kane ka jingeh, bad ban ong ba nga khlem wan kum u Myntri Rangbah, hynrei kum u nongialam, kum u nongshong shnong bad kum u briew uba kwah ban ïarap. Ngam lah tuklar ïa kane ka jingeh, hynrei nga la pynsngewthuh ïa ki nongtrei, ki samla pule ba ngi dang wad ki lad ki lynti ban pynbeit lang ïa kane ka jingeh.”
