Nongstoiñ, Ïaiong, 08: Kum shi bynta ban pynneh pynsah ïa ki doh um doh wah bad mei mariang, ka shnong Nongkaniang kawei na ki shnong khap sor ha ka thaiñ Nongstoiñ West Khasi Hills District, ryngkat ka jingïasnoh kti lang ka shnong Mawkynjoiñ, ka la maham tyngeh ïa ki briew kiba leit wieh dawai bad kiba ju leit pynbthei bom ïa ki doh um doh wah ha ka ki ar tylli ki Wah shnong, kiba kynthup ïa ka Wah Umseiñïong bad ka Wah Ummiang. Lada lap da lei lei kan ym map hynrei kan leh tyngeh ban pynshitom ryngkat ka kuna kaba heh.
Ka shnong ka la ong shuh shuh ba da lei lei yn ym shah shuh ban tong doh naduh u bnai Naiwieng haduh u Ïaïong, kata ruh lada ka aïom lyiur ka wan kloi yn shah ha u bnai Ïaïong. Lym kumta ym shah toi lada ym wan kloi u slap bad ka jingkhang ban tong doh ka long naduh ban Khwai, tong Tongsong bad kiwei kiwei.
Ka shnong ka ïawer ruh ïa ki shnong marjan ban ïatreilang kumba ka shnong Mawkynjoiñ ruh ka la ïatreilang. Ka shnong ka la buh ruh ïa ki nongpeit pyrman wat ha ka por miet bad lada lap ym don jingmap.
Ha ka jingleit jurip ïa ka wah Umseiñiong bad wah Ummiang ha ka sngi saitjaiñ, la ïadonlang u bah Benansius Wanñiang bah Cyprian Langrin bad kiwei kiwei kiba la lamkhmat ruh ban leit jngoh bad jurip.
