Kynmaw lang ïa ka Phan Nonglait, ka dei ka khlawait ba shlur ba ïarap ïa u Tirot Sing: Grace Kharpuri

Shillong, Naitung 17 : Ka President jong ka NPP Women’s Front, Kong Grace Kharpuri ha ka sngi Palei ka la ong ba ka por ka la dei ba na ka liang ka party kan pyrkhat lang ruh ïa ka Phan Nonglait, kaba dei kawei na ki khlawait ba shlur ha ka por jong u Tirot Sing Syiem ban ïakhun pyrshah ïa ki dohlieh ha kato ka por.
Ïa kane ka Kong Grace kaba dei ruh ka MDC jong ka Nongshken ka la kren ha ka jingïalang ba lyngkot ban kynmaw burom ïa jingdap 190 snem ka jingkhlad noh u Tirot Sing ïa kaba la pynlong da ka Party ha khmat u motdur jong une u khlawait uba pynieng ha phyllaw jong ka State Central Library, Shillong.
“Ka la dei ka por ïangi ban kynmaw lang ïa ka Phan Nonglait bad kumta na ka liang ka party ba ngin kynmaw bad buh lem noh uwei u mot na ka bynta jong ka kum ka jingkynmaw burom bad kynmaw ieid ïa ki kam shlur jong ka,” ka la ong.
Ka Kong Grace ka la ong ruh ba ka jingmih jong ka kshaid Phan Nonglait kadei namar kadei ha kato ka jaka ba la ïoh ban kurup noh ïa ki tiar thma ha ka por ba ki dohlieh ki la thait. Ka la ïathuh ba dei ka Phan Nonglait kaba la shim ïa kitei ki tiar thma baroh bad leit bret ha kawei ka thliew kaba don ha katei ka jaka hi.
Halor kane, na ka liang u Working President ka party, Bah Hamlet Dohling u la ong ba ki sngew ïahap ïa kane ka jingtyrwa jong ka Kong Grace. “Na ka liang ka party kan sa shong bad pyrkhat bad kan sa thoh ruh sha ka sorkar ba kan ai jaka ïangi ha Phan Nonglait Park bad lada ka sorkar ka ai jaka ngin sa pynieng ïa u motdur jong ka Phan Nonglait khnang ba ka pyrthei baroh kawei kan tip ba pleng ki longkmie Khasi jongngi ruh ki dei ki ki ‘riewïaleh’.