Shillong, Risaw, 28: Ka Khasi Student Union (KSU) South West Khasi Hills District ha ka sngi Thohdieng ka la rakhe kynmaw burom ïa ka lyngkhuh sngi ïap kaba ar snem jong i Meiieit Spelity Lyngdoh Langrin da kaba leit buh syntiew ha u lum jingtep ha Domïasiat.
Ka KSU ka la rakhe ruh ïa kane ka sngi kum ka “sngi pyrshah Uranium” namarba i meiieit Spelity i dei ka nongïalam ha ka jingïakhih pyrshah tih Uranium kum ka trai khyndew da kaba i la kyntait ruh haduh ka sngi jingïap ïa ka spah klur ba la thong da ka Uranium Corporation of India Limited (UCIL) ban ïoh khlong ïa u Uranium na ka jaka jong i kaba don ha Domïasiat.
Ki dkhot ka seng hapoh ka jingïalam jong u Vice President u samla Shemphang Nonglang bad u General Secretary u samla Jiedskhem Nongsiej ki la teh da ki banner ha kylleng ki bynta ka Iew Mawkyrwat kum shibynta ban kyntu bad pynsngew ïa ka thaiñ ba ki paidbah kim dei ban klet ïa ka jinglenlade bad ka jingshynrang mynsiem jong i Meiieit Spelity kaba la pynlong ïa ka South West Khasi Hills District ba kan long kumne kumba ka long kat haduh ba ka Sorkar India bad ka UCIL kim nud shuh ban ïaid shakhmat halor kane ka jingthmu.
“Kum ka seng, ngi shim ba ki kam bad ki matti jong i meiieid Spility Lyngdoh Langrin ki la long shisha ki jinghikai bad ki jingpynshlur ïa ki dkhot ka seng bad ïa ka jaitbynriew ban ieng skhem ha la ka nongrim . I la long shisha ka riew khraw ha kaba i la kyntait ïa ka spah klur ba la tyrwa sha i. I la kyntait ïa ka ‘lei longspah da kaba i la pyni ïa ka jingskhem nongrim jong i haduh ka sngi ka jingïap da kaba ieng skhem ban pyrshah ïa ka jingtih Uranium da kaba peit jngai bad pyrkhat ïa ka lawei jong ka thaiñ bad ka jaitbynriew,” la ong ka Seng.
Ka Seng seng ka shim ïa i Meiieit Spelity kum ka nongïalam bad long shisha kum u païa baskhem bad ba kyrshan ban pynskhem ïa ka nongrim ban pyrshah ïa ka jingtih Uranium ha kaba kum ka seng kan ïai pyrshah wat haduh ka sngi jong ka jingïap.
