Ha u bnai Naiwieng yn plie noh ïa ka Patharkhmah Civil Sub-Division, pynbna u Myntri Rangbah ka jylla

Nongpoh, Risaw 28: Ka long ka khubor kaba kmen bad kaba ai jinghun na ka bynta ki paidbah ka thaiñ Ri Bhoi Sepngi ha Ri Bhoi District, ha kaba mynta ka sngi u myntri Rangbah ka jylla, u Conrad K. Sangma u la pynbna syndon ban plie noh ïaka Patharkhmah Civil Sub Division haka 24 tarik Naiwieng 2022 ban pynsuk bad ban pynïajan ïa ki kam shakri sorkar na ka bynta ki paidbah katei ka thaiñ Ri Bhoi Sepngi haka jingïalang kaba la long mynta ka sngi ha Byrnihat ban kyntiew kyrdan noh ïaka Byrnihat PHC sha ka CHC.
Katei ka mat ban pynurlong ïaka jingdawa Civil Sub Division kam dei shuh kaba dang thymmai hynrei kadei kaba slem bah bad kumba long haduh mynta ka Patharkhmah Administrative Unit kala Don mynta kumba 33 snem bad kala dei ka por ba ih bha ban kyntiew kyrdan noh sha ka Civil Sub Division, bala pynkhreh ruh wat ïaki jaka puta ban tei ïaki ophis sorkar.
Ka Civil Sub Division ha Patharkhmah ka dei ka jingangnud bala slem jong ki paidbah lah bun phew snem kumba ka Dorbar hi kala ju dawa naduh ki por ba mynshuwa halor ka jingdonkam ban ioh noh ïaka Civil Sub Division, kaba ka Patharkhmah ka don ruh ïaka jingheh kumba 48 hajar hectare, bad ki don kumba 110 tylli ki shnong bad katkum ka khana samari jong u snem 2011 ki don kumba 35 hajar ngut ki nongshong shnong.
Halor katei ka jingpynbna jong u Myntri Rangbah ban plie paidbah noh ïaka Civil Sub Division naka liang u MLA ka Jirang u Bah Sosthenes Sohtun ryngkat ka kynhun jong ka Patharkhmah Civil Sub Division Demanding Committee mynta ka sngi kila pynpaw ka jingsngewkmen kaba khraw, halor ka jingshimkhia jong ka sorkar kaba dei lyngba ka jingtrei shitom jong u MLA ban leit tynruh sha u Myntri Rangbah ba katei ka jingangnud jong ki paidbah mynta kala urlong hadien bun snem bad bun ki nongmih khmat kiba la leit noh kim shym lah ban leh eiei.