Hiar u Myntri Rangbah ban buh mawnongrim ban kyntiew kyrdan ïa ka PHC Byrnihat sha ka CHC

0

Nongpoh, Risaw 28 : Hadien bun snem ka jingangnud jong ki paidbah naduh ki nongïalam shnong bad khamtam ki paidbah ban kyntiew kyrdan noh ïaka Byrnihat PHC sha ka CHC, katei ka jingphohsniew bad ka jingangnud jong ki paidbah kala urlong mynta ka sngi hadien ba u Conrad Sangma Myntri Rangbah ka jylla u la hiar sha Byrnihat ban buh mawnongrim ban kyntiew kyrdan noh ïa katei ka PHC sha ka CHC haka jingïalang kaba la long ha madan BSA, Lumnongrim Byrnihat.
Kum ban shu pynpaw baka Byrnihat PHC ka dei kaba la donkam eh ban kyntiew kyrdan noh sha ka CHC kaba ai ka jingshakri mynta sha palat 40 hajar ngut ki paidbah nongshong shnong bad ka long shisha ka jingeh kaba khraw ïaki nongtrei ka tnad ka koit ka khiah naka jingnang roi ki briew bad ka jingduna ki nongtrei, ban pynbiang ïaki jingshakri haka liang ka koit ka khiah, kaba don mynta tang 10 jingthiah, hynrei da ka jingkyntiew kyrdan noh ïa katei ka PHC sha ka CHC kan long ka jingmyntoi bad ka jingkyrkhu kaba khraw ïaki paidbah ba katei ka jaka sumar yn kyntiew pat sha ka 30 jingthiah.
La sakhi ruh ha katei ka sngi da ka jingdonlang u Bah Sosthenes Sohtun MLA ka Jirang, Bah Victor Rani MDC ka Jirang, Bah M Tongper ADC ka Ri Bhoi, Dr. P Kharnary DMHO ka Ri Bhoi District bad kiwei kiwei ki riew rangbah ki ophisar naka tnad ka koit ka khiah.
Na ka liang ki riew paidbah ki nongïalam shnong kila ai ka jingïaroh ïa u Myntri Rangbah, MLA ka Jirang bad ïa ka sorkar MDA baroh kawei kaba la shimkhia ban pynurlong ïaka jingangnud ki paidbah ban kyntiew kyrdan noh ïa ka PHC Byrnihat sha ka CHC.
Haba kren ha katei ka sngi naka liang u Conrad Sangma u la pynpaw ka jingsngewkmen kaba khraw ba dei ka jingtrei shitom jong u MLA ba ïa katei ka PHC la lah ban kyntiew kyrdan noh sha ka CHC kumba ka sorkar ka don ïaka thong ban kyntiew ïaka tnad ka koit ka khiah khamtam ban ai ka jingshakri kaba paka tam sha ki paidbah nongshong shnong haka jylla.

Leave A Reply

Your email address will not be published.