Kynduh u CM ïa ka thei ïalehkai Pankration bad Jeet Kune Do ba pawnam kiba mihkhmat ïa ka jylla

Shillong, Jymmang 09 : U Myntri Rangbah ka Jylla, Conrad K Sangma hynin ka sngi u la kynduh ïa ka thei ïalehkai Pankration na ka jylla, ka Lorenza Songthiang kaba pynkhreh mynta ban leit aireng ha ka World Combat Games kaban long ha Riyadh, Saudi Arabia mynta u snem.
Ka Lorenza ka la ïoh ruh ban thaw history da kaba kylla long ka thei ïalehkai ba nyngkong na Meghalaya ban ïoh rung sha katei ka lympung World Combat Games.
Ha ka lympung kaba dang shu dep jong ka World Pankration Championship 2023 kaba dang shu lah shen ha Tashkent, Uzbekistan ka Lorenza ka la ïoh ban khur ïa ka takma rnong.
Ha kane kajuh ka sngi, u Myntri Rangbah u la kynduh ruh ïa ka samla Ilawankmen Nongbri kaba la khur ïa ka takma ksiar ha ka 2nd World Jeet Kune Do Championship kaba long ha Kandy, Sri Lanka ha u Lber 2023.