Shillong, Jymmang 09 : Ka Shillong Sports Association hynin ka sngi ka la pynbna ba ka lympung ïalehkai phutbol ki kynthei ba la tip kum ka Women’s Football League kan sdang biang naduh ka 03tarik u Jylliew mynta u snem.
Kumban shu pynkynmaw ha ka samoi ba la dep, ka Mawlai Sports Club ka la rah ïa ka nam lahduh da kaba pynliem ïa ka Laitkor Sports Club ha katei ka lympung kaba la wan ban shim bynta haduh 12 tylli ki klob.
Ki bor pyniaid ki pyntip ruh ba ki klob kiba la pynïasoh bad ka SSA ha East Khasi Hills ki lah ban shim bynta lang ha katei ka lympung. La pyntip ruh ba kan ym don satia ka jingpynkiew ïa ka khusnam pisa hynrei kan neh beit 30,000 tyngka ïa ka lahduh katba ka kynhun kaba wan ba ar pat kan ïoh rah ïa ka song pisa kaba 18,000 tyngka.
Nalorkata la pyntip ruh ba ka por ïalehkai kan long beit mar 30 minit shilliang. Ki bor pynïaid ki la pyntip ruh ba ka bai rung na ka bynta kawei kawei ka kynhun kan long 1000 tyngka ha kaba kin hap ban siew sha ka SSA ha shwa ka 27tarik Jymmang. La pyntip ruh ba kawei kawei ka kynhun ka lah ban rejistar haduh 25 ngut ki nongïalehkai da kaba siew 50tyngka marwei bad ka jingrejistar ïa ki nongïalehkai kan dei ban dep ha shwa ka 01tarik u Jylliew. Kawei pat ka jingbthah ka long ba ki nongïalehkai ki hap ruh ban don ïa ka photocopy ba ki la dep ban ai tika hashwa ban rejistar. La bthah ruh ba kito ki bym biang ïa ki kot ki sla kin shah kyntait bad kin ym ïoh satia ban shim bynta.
Ha kajuh ka por la pyntip ruh ba ki klob kiba ïa shim bynta ki lah ruh ban rejistar hapoh lai ngut ki nongpynïaid.
