Nongpoh, Nailur, 13: Ka jingthud palat ka bording elektrik haka thaiñ Ri Bhoi Sepngi kala pynbitar ïa kiba bun ki paidbah ha katei ka thaiñ kaba ktah ïa ki kam ki jam jong ki paidbah, ki samla pule bad halor katei ka nongrim naka liang ka seng HYC mynta ka sngi kala leit ban ïakynduh syndon ïa u SDO ka MeECL Patharkhmah Division hadien ka jingujor bad ka jingud ki paidbah sha ka seng.
Haba kren sha ki lad pathai khubor naka liang u Bah C Thangkhiew President ka HYC Ri-Bhoi Sepngi haka jingsynran lang u Bah Tony Shylla General Secretary ka Ri-Bhoi District bad ki dkhot, u la ong ba kadaw bala pynlong ïaki nongïalam ka seng ban leit kynduh syndon ïa u SDO ka dei namar ka jingthud palat ka bording ha katei ka thaiñ kaba la buh jingeh ïaki paidbah namar ka bording kam ju neh satia lada slap ruh lip, lada rang ruh lip bad ki paidbah kim ioh ban pyndonkam thikna ïaka bording.
U la ong ruh ba kum ka seng ka dap da ka jingsngewkhia kaba jur hadien ba bun naki paidbah katei ka thaiñ kila wan ban ud ban nam sha ka seng khamtam ha kum kane ka por ba ki khynnah pule kila jan sdang ki eksamin kut snem jong ki bad kala dei ka por ba kum ki samla pule kin pynkhreh shaid shaid ïaki jingpule jong ki bad ym tang ki samla pule bun naki paidbah kiba trei ïaki kam ki jam ba pyndonkam da ka bording kila hap ban shu sangeh bad duh kamai.
Shuh shuh ha katei ka jingleit kynduh jong ka seng ïa u SDO, naka liang u SDO u la pynshai ba ka daw ka jingthud ka bording ha katei ka thaiñ Ri-Bhoi Sepngi ka dei namar ka jingduna palat ki nongtrei bad kumjuh ruh ka jingbym siew thikna ki paidbah ïaka bai bording, ha kaba kum ka seng kala pynpaw ba katei ka daw kadei ka kamram jong ka tnad MeECL ban pynbiang ïaki nongtrei khnang ba ka bording kan long thikna ha katei ka thaiñ.
Bad halor ka jingbym siew thikna ki paidbah ïaka bai bording, naka liang ka seng kala kyrpad sha kito ki paidbah ba ki dei ban long thikna ka rukom siew bad naka liang ka tnad MeECL kala ai jingmut ruh ban pynlong da ka kynja prokram jingpynshai sha ki paidbah khnang ba ki paidbah kin shimkhia ban siew ïaka bai bording, bad kum ka seng kala pdiang ïa katei ka jingai jingmut ban sa pynlong shen.
