Shillong,Nailar 05 : Ki trai bad ki nongñïah kali ba kit maw kit shyiap hapoh ka lama jong ka Local Truck Owners and Drivers Association ka Hima Mylliem ki la dawa na ka sorkar ba kan pynlong da ki prokram pynsngewthuh paidbah halor ki kyndon aiñ jong ka Meghalaya Mineral (Prevention of Illegal Mining Transportation and Storage) Rules, 2022.
Haba ïakren bad ki lad pathai khubor, u President ka Mylliem bad Khyrim Local Truck Owners and Drivers Association, u Bah Egenstar Kurkalang u la ong ba ka sorkar shwa ban pyntreikam ïa kine ki kyndon kam shym la pynshai ne pynsngew paidbah halor ka Meghalaya Mineral (Prevention of Illegal Mining Transportation bad Storage) Rules, 2022.
U la kynnoh ruh ba kane ka rai ka la buh jingeh ïa ki trai par bad ki kali ba kit maw kit shyiap namar ba bun ki kali ki la shah kurup bad shah pynshitom.
Shuh shuh u la ong ruh ba bun ki paw mawshun bad ki trai kali kim shym la tip ïa kum kane ka aiñ kaba la wan ha u snem 2022 bad kane ka jingpyntreikam kynsan ïa kum kine ki challan ka la pynlong ïa ki trai kali ban duh noh ïa ki kali.
“Ka jingpyntreikam ka Sorkar Jylla ïa ka Meghalaya Mineral Transportation and Storage Rules, 2022 ka la pynlyngoh ïa ki trai par bad ki trai kali namar ym shym la don kano kano ka jingpynshai halor ka jingpyntreikam ïa ki kyndon kiba kdew ba donkam ban don ïa ka challan na ka bynta ban shalan maw shalan shyiap,” bynrap biang u Bah Kurkalang.
Shuh shuh u la ïathuh ba kane ka rai ba kynsan kynsan jong ka sorkar jylla ka la pynlong ïa ki trai par bad ki trai kali ban sangeh noh ka shalan maw shalan shyiap naduh ka 05tarik mynta u bnai.
Ha kaba ïadei bad kane, u Bah Egenstar u la pyntip ba ka seng kan sa pynlong ïa ka jingïalang ha ka 08 tarik u Nailar ha ka shnong Umphyrnai ban ïakren halor ka jingpyntreikam ïa ka Meghalaya Mineral (Prevention of Illegal Mining Transportation and Storage) Rules, 2022.
