Shillong, Nailar 05: Ka Rationalisation Committee ka la trei borbah ban kyntiew ïa ka tulop na ka bynta ki ki nongtrei bapher bapher jong ka All Meghalaya SSA Non Teaching Staffs Association (AMSSANTSA) kiba la dawa lyngba ka jingthoh ha shwa ba kin sangeh noh ïa ka jingshong kyllaiñ myngor kaba khlem pud sngi bad na ka liang ka seng ka la ong ruh ba ka sorkar ka dei ban pynurlong ïa ki jingdawa ha shwa ba ka seng kan weng ïa ki jingïakhih.
Hadien ka jingïalang kaba la long ha ka sngi Nyngkong bad ki dkhot ka AMSSANTSA, u Commissioner & Secretary, Education u Vijay Kumar Mantri, uba la khlieh ïa ka Rationalisation Committee u la ong, “Ngi la ïakren ha kaba ïadei bad ka kam kyntiew tulop ha ki kyrdan bapher bapher bad ïa kane ka jingïalang yn sa pynbna ha ka sngi baar.”
“Ki dkhot ka committee ki la ai ïa la ki jong ki jingkynthoh ha kaba ïadei bad ki jingtyrwa ban kyntiew ïa ki tulop jong ki bad ïa kane na ka liang jong ka sorkar ka dang pyrkhat. Ka (AMSSANTSA) ka la pyntip ba kin sa shim ïa ka rai ba kin wengnoh ïa kane ka jingïakhih hadien ba ka sorkar ka la shim ïa karai kaba khatduh ka ban long ha ka sngi baar ne kham hadien,” u la ong.
ïa kane ka jingïalang la pynlong hadien ba ka AMSSANTSA ka la rai ban bteng ïa ka jingïakhih kaba shong kyllaiñ myngor ba ki la dawa ban kyntiew ïa ka tulop jong ki kaba long 80%.
Haba kylli u Mantri u la ong, “Ngi dang trei shitom ha kaba ïadei bad kane ka jingdawa jong ki. Ngi dang pyrkhat ruh ban pynduna ïa ka rukom siew kaba dei hapdeng ka high and low bad ka jingsiew kaba bun kaba long katkum ka jingshakri jong ki. Ka jingtip kaba bniah ka long ruh hadien ba la mynjur da ka sorkar.”
Haba kren sha ki lad pathai khubor ka president jong ka AMSSANTSA ka Jennyfer Synrem ka la ong ba ka jingïakren ka la long kaba bha kaba la long ha kane ka sngi.
“Hynrei ngi kwah ïa ka jingïakren kaba long lyngba ka jingthoh bad dei halor kane ba ngim pat pynkut ïa kane ka jingïakhih jong ngi. Ngin bteng ïa ki jingïakhih jong ngi da kaba jai jai. Ai ba ka sorkar kan ai da ka jingthoh kaba shai kaba ki dei ban kular hapoh kane ka taïew ha shwa ba ngin pynkut ïa kane ka jingïakhih jong ngi,” ka la ong.
