Shillong, Rymphang 24 : Hadien ba ka NPP kam shym la lah ban leh bha ha ka elekshon MDC kaba dang shu dep ha ki 29 tylli ki constituency jong ka KHADC, na ka liang u Nongai ktien jong ka NPP Bah HM Shangpliang u la kubur ïa kane khamtam haba ka party ka jop tang saw ngut ki MDC.
“Ha ka KHADC, ngi la pynieng haduh 25 ngut ki kyrtong hynrei ngi la ïoh tang 4 tylli ki seat. Ka don ka daw hangno re hangno bad kumta ngi donkam ban peit bniah ïalade bad wad bniah haei ka don ka jingbakla bad na ka liang ka party kan sa shong ban bishar bniah ïa ki jingtreikam jong ka party ha man la ki constituency,” ong u Bah HM Shangpliang.
Tangba u ong pat ba ka dei ka jingshisha ba ki kyrtong ka party ki la wan ha ka kyrdan kaba ar ha kiba bun ki constituency ban pyni ba ka NPP kam shym la leh sniew palat.
“Lada don ki jingbakla hangno hangno ne ki don ki jingduna hangno hangno, ngin pyrshang ban wad bad pyrshang ban pynbeit ïa kita ki jingeh hangno hangno ba ki don namar ngi kwah ban shakri ïa ki paidbah,” u la ong.
“Ngi kwah ban burom ïa ka rai jong ki paidbah bad ngi kwah ruh ban ïathuh sha ki paidbah ba ka NPP ka don hangne ban shakri na bynta jong ki paidbah. Na ka Party nga ai khublei ïa ki paidbah ha man la ki constituency kiba hap hapoh ka KHADC,” u la bynrap biang.
Shuh shuh u la ong ba ki MDC ka NPP ki long kiba la khreh ban shong ha ka liang pyrshah ryngkat bad kiwei pat ki paralok bad kin shakri ïa ki paidbah ha kine ki khyndiat snem ban wan ha ka District Council.
Nangta u ong ruh ba kane ka result jong ka elekshon MDC kam dei satia ka jingpyrshah jong ki paidbah ïa ka sorkar.
“Ki paidbah ki lah ban kwah ia ka jingkylla ha ki District Council hynrei hooid ka party ka don ha ka sorkar hapoh ka jingïalam jong u Conrad K Sangma bad kumta ngin dang bteng ban shakri ïa ki paidbah kham bha shuh shuh,” u la bynrap biang.
