Shillong, Naitung 03: Hadien jong ka jingïaibteng ka Shillong Municipal Board ban ïai talasi ïa ki laisen jong kiba shongdie madan, la ïohi mynta ba katba nangmih ki sngi ka lynti ïaid kjat kaba ha khyndailad ka la nang kylluid kylluid.
Ïa kane la ïohi naduh ka sngi Nyngkong ba la sdang ka jingpynlong ïa ka jingkyndang jong ka Shillong Municipal board ïa kiba shong madan ha baroh shi lynter jong ka khyndailad kaba la ïai pynjur haduh ka sngi Palei jong une u taïew.
Kane ka jingkyndang ka long ban khmih ïa ka jingdon ki certificate of vending jong kiba shong madan.
Ha ka sngi Palei la ïohi ruh ba kiba shong madan ha kane ka thaiñ naduh mynstep ki la burom ïa ki bor pynïaid ha kaba ki la pynrit ïa ki jaka shong jong ki bad kumjuh ban ym tur palat shakhmat ka lynti ïaid kjat jong ki paidbah.
La ïohi ruh ba ki paidbah ki la ïoh ban ïaid da ka jingkylluid ha kane ka sngi, bad wat ha ka nohphai sngi ruh kane ka lynti ka la kham kylluid wat hapdeng ka jingdon jong kiba bun ki briew.
Haba u nongthoh khubor u la ïoh ban leit khmih ïa ka jinglong jingman jong kane ka jingïaibteng ka jingkyndang ïa kiba shong madan, la shem shisha ba ki briew ki la ïoh ban ïaid da ka jinglaitluid khlem da don than kiba pynwit la ka dei ïa ki tiar ba ju die madan bad kiwei kiwei.
