Ailad ïa u MP Rajya Sabha thymmai un dei na rilum Khasi-Jaiñtia, pynpaw bun ki nongïalam Party

Shillong, Naitung 03 : Ka jingïakren shaphang ka jingjied ïa u MP ba thymmai sha Rajya Sabha na ka jylla Meghalaya ka la sdang ban shongshit bha khamtam ha ka sorkar synrop jong ka Meghalaya Democratic Alliance (MDA) kaba ïalam da ka National People’s Party.
Kumba long mynta hi, ka samoi treikam jong u MP ba mynta ha Rajya Sabha, Dr. WR Kharlukhi kan sa kut noh ha u Jylliew jong u snem ban wan.
Ha kine ki khyndiat sngi, hadien ba la phriang ki khubor ha ki rynsan social media haba ïadei bad ka jingjied ïa u MP ba thymmai sha Rajya Sabha, na ka liang u Mawphor u la ïoh ban ïakren lut bad baroh ki nongïalam jong ki party kiba don ha ka sorkar MDA.
Tangba ha ka jingïakren, ki la pynpaw ba namar kane kadei ka ishu kaba ktah ia ka rai jong ka sorkar synrop baroh kawei kumta ki la ong ba ki long kiba kloi ban pynpaw ïa ka jingsngew jong ki tang lada buhrieh noh ïa ka kyrteng bad ka party ba ki don.
Kumta, ha ka jingïakren bad ki, kine ki nongïalam jong ki party bapher bapher ki la pynpaw ba ïa kane ka mat ki la dep ban ïa pynpaw hapdeng jong ki tangba haduh mynta hi kam pat don ka jingïakren ha ka party ha ka rukom kaba dei.
“Namar ka por ka dang don bad ka dang kham kylluid kumta ngi ap shwa kaei ka sienjam ba na ka liang ki nongïalam jong ki party bapher bapher kiba donlang ha ka sorkar MDA ki don ban ong ha shwa ba ngin shim ïa ka rai,” ong uwei na ki MLA ba don ha ka sorkar.
Haba ïoh ban ia kren bad kiwei pat ki nongïalam jong ki party, ka sur pdeng kaba mih na ki ka long beit ba ki kwah ba u MP ba thymmai sha Rajya Sabha dei ban ailad biang na rilum Khasi Jaintia.
Da kaba ïaroh ïa ka jingnoh synniang jong u Dr. WR Kharlukhi uba la ieng ban ïasaid na ka bynta kiba bun ki ishu jong ka jylla, kine ki nongïalam ki ong ruh, “Ka jylla ka don bun bha ki nongïalam, kumta haba ka phah ïa ki MP sha Rajya Sabha ka dei ban bteng ban phah da ki briew kiba stad kiba shemphang bad kiba don ka sur ban pynsawa ha Iing Dorbar Thawaiñ jong ka Ri bad khamtam hakhmat ki ophis jong ka sorkar pdeng.”
Halor ka jingkylli, la ki party ba donlang ha ka sorkar synrop ryngkat bad ka NPP kin pynieng kyrtong la u jong ne kin treilang ha kajuh ka lama jong ka sorkar MDA, ka jubab kaba ki ai ka long ba kane baroh kan sa shai tad haduh ba ki nongïalam jong ki party bapher bapher kin kynduh lang.
“Ngi khmih lynti ba u Myntri Rangbah uba bat ruh kum u National President jong ka NPP un ym pynslem shuh ban lum lang ïa ki nongïalam jong ki party bapher bapher ban ïakren ïa kane ka kam khnang ba ka sur jong uba bun ba lang kan long ka jingjop,” bynrap sa uwei u rangbah na kawei ka party.
Don pat kiba pynpaw ba ki ishu kiba ïadei bad ka jylla ki dang bun bha kiba ïadei bad donkam ïa ka jingtuklar jong ka sorkar pdeng. Kumta ki ong ba dei tang lada phah da u Nongïalam uba nud bad uba shemphang ba ka jylla kan ïoh ban buddien ïa kine ki kam bad ki projek kiba dei na ka bynta ka roi ka par bad ka shongsuk shongshngaiñ jong ka jylla.
“Kumba phi ïohi hi, ki dang don bun bha ki mat kiba ïadei bad ka jylla, la ka long naduh ka ILP, ka jingdawa ban ïoh jingithuh ïa ka Ktien Khasi bad Ktien Garo ha ka Khyrnit kaba Phra. Nalor kine, ki don ruh bun ki projek kiba ïadei ha ka jylla la ka long naduh ka ishu lynti rel, nangta ban buddien ïa ki projek kiba heh bad kiba bun kiba dang sahkut ha ki tnad bapher bapher jong ka sorkar pdeng. Kine ki don ha ka bor bad ka jingshemphang jong u MP ban ïakhun lang bad ïarap ïa ka sorkar jylla ban ïakren bad ka sorkar pdeng,” ki la ong.
Kumba long mynta hi, ka sorkar synrop ka la do ïa ka jingkyrshan jong ki 50 ngut ki MLA, kata tang ka NPP marwei ka don 32 ngut ki MLA, bud sa ka UDP – 12 ngut, katba ka BJP, HSPDP bad Independent pat mar arngut.
Katba ha ka Liang Pyrshah pat ki don 10 ngut ki MLA ba kynthup 5 ngut na ka AITC, 4 ngut na ka VPP bad marwei na ka Congress.
Kumban shu pynkynmaw ba ha ka elekshon MP Rajya Sabha ha u snem 2020, u Dr. Kharlukhi u la jop da 39 la 19 vote ïa u kyrtong jong ka Congress.