Shillong, Naitung 03: Ka Shillong Municipal Board ha ka sngi Palei ka la ïaibteng ban talasi bad shim kyrteng ïa baroh kiba shongdie jingdie ha madan ha baroh shilynter jong ka Khyndailad tat haduh ka 22, tarik jong une u bnai Naitung ha shwa ba kine kiba die madan baroh khamtam eh kito kiba la don ïa ki Certificate of vending kin hap ban leit shong noh sha ki jaka ba la pynkhreh da ka Sorkar.
Lah ban ong ba kane ka jingkyndang ïa kito kiba shong madan kaba la sdang naduh ka Sngi nyngkong ka long ruh halor ka hukum jong ka Ïingbishar High Court Meghalaya kaba la bthah ïa ka Sorkar jylla ban pynbiang ïa ki jaka na ka bynta kiba shongdie madan kiba ka Sorkar ka ruh ka la dep ban leh ïa kane ka jingbthah.
Ha ka sngi Palei ka jingtalasi bad shim kyrteng ïa kito kiba shong madan ka la long kaba jai jai khlem mih kano kano ka jingjia ïapyni nia ne ïakren khluit.
La ïohi ruh ba ki ophisar jong ka tnat Shillong Municipal Board ki la kren ruh da kaba jai jai ïa kiba shongdie madan bad kumjuh ruh na ka liang kiba shong madan ki la jubab ruh ïa ki jingkylli ki nongtrei ka Municipal da kaba jai jai khlem don shuh kiba ïania ne ban kren ki ktien kiba khor ha kane ka sngi.
Lah ban ong ba kane ka jingtalasi ïa ki certificate of vending kan ïaibteng manla ka sngi tat haduh ka 22 tarik mynta u bnai Naitung kumba la bthah da ka tnat Shillong Municipal Board bad ka tnat Urban Affairs bad kumba ka long mynta kane ka kam ka dang sah ruh hapoh ka jingshim bishar jong ka Ïingkashari ka Meghalaya High Court.
