Ka jingïakhih jong ki nongtrei ASHA da kaba shongsngi ha iing bad sangeh ban leit sha ki kam kiba la bynshet da ka tnat ka Koit ka Khiah jong ka Sorkar Jylla ka la kylla long pynban ka thma ktien hapdeng ka Meghalaya ASHA Worker’s Union bad ka Myntri ka tnat ka Koit ka Khiah ka Sorkar Jylla ka Dr. Ampareen Lyngdoh.
Ki nongtrei ASHA ki kam ba ki ïoh ïa ka jingsiew kaba tang ar hajar shi bnai bad nalor kata ruh kim ju kham ïoh tista katba ka Myntri ka ong ba ki ASHA ki ïoh ïa ka jingsiew kaba haduh 5 hajar shi bnai. Haba kumne ïano yn ngeit?
Mynta ka sngi ka Myntri ka la pyntip ruh ba ki don ki ASHA kiba ïoh ïa ka bainong ka jong ki kumba 18 hajar, 28 hajar bad kawei na ki ASHA kaba trei hapoh ka Bhoirymbong CHC ka ïoh haduh 31 hajar tyngka. Haba kumne ïano yn ngeit? Lada ka long kumba kam ka Myntri hato yn dang lah ban mutdur ba ki ASHA kin hap ban sangeh ïa ka jingai jingshakri tang namarba ki dawa ban kyntiew ïa ka jingsiew?
Dang ha kine ki khyndiat sngi, ka tnat ka Koit ka Khiah ka la pyntip ba ka Sorkar ju siew tista ïa ka bainong jong ki ASHA manla u bnai nalor kaba pyntreikam ïa ka “ASHA First” Application na ka bynta ka jingsiew bainong hapoh ka National Health Mission (NHM) khnang ban pynthikna ba ki nongtrei ASHA kin ïoh tista ïa ka bainong ha ka por ba la pyllait pisa bad la pyntip ruh ba ki nongtrei ASHA kiba kham trei shitom ki ïoh ïa ka jingsiew kaba T. 7000 haduh T. 8000 shi bnai. Ka tnat ka Koit ka Khiah ka pyntip ruh ba naduh u snem 2022, ka la pyllait ïa ka pisa sha ki nongtrei ASHA T. 21.89 klur lyngba ka Application ha ki 12 bnai ba la leit noh bad haduh T. 34.50 klur ladep ban pyllait ïa ka pisa ha ki 18 bnai baladep.
Nalor ka jingsiew ïa ka bainong, ka tnat ka Koit ka Khiah ka siew ruh ïa ka Meghalaya Maternity Benefit Scheme (MMBS) bad ka Meghalaya ASHA Benefit Scheme (MABS), kaba kot T. 53 klur kaba dang sah pongding naduh u snem 2013 ïa kaba ladep ban pyllait ha ka jylla hapdeng ki snem 2021-2022.
Ka jingbym treikam jong ki ASHA ka la buh jingeh bha ïa ki shnong ki thaw khamtam ha ki shnong nongkyndong haba don ki longkmie kiba armet ne kino kino ki kam kiba ïadei bad ka koit ka khiah. Ka jingïakhih jong ki nongtrei ASHA ka la pynlong ruh wat ïa ka tnat ka Koit ka Khiah ka Sorkar Jylla ban kyrpad ïa ki Village Health Council (VHC) ban khih ban ksar da kaba wad ïa kino kino kiba lah ban long ki nongtrei monsngewbha (la ki dei ki dkhot ka VHC) ban pyntyllun shakhmat ïa ka kam katba ki ASHA ha ka jylla baroh kawei ki dang pynlong ïa ka jingsangeh treikam kaba khlem pud sngi.
Mynta ka tnat ka Koit ka Khiah ka ïakynduh mawsiang hi khait namarba u synñiang u bynhei uba ki nongtrei ASHA ki la noh sha u sup u thiar jong ka imlang ka sahlang u dei uba ka Sorkar kam lah satia ban shu kheiñ dewthala. Haba ka jylla ka la mad ïa ka jingwan lynshop jong u khñiang jingpang COVID-19 dei ki nongtrei ASHA kiba long ki shipai kiba hakhmat eh ban tur ïa ki raieh raidam haba don kino kino ki longkmie kiba armet ban pynkit sha ki jaka ai jingsumar, ban peit ïa kino kino kiba ïabit jingpang, ban lum jingkheiñ nadong shadong.
Lada ka Sorkar ka dang pyneh ïa ka dohnud kum u Pharo kan sa buh ka jingeh ïa ki shnong ki thaw bad kam long ruh kaba suk ïa ki dkhot ka VHC ban trei ïa ka kam kaba ki shu shaniah ha ki nongtrei ASHA baroh shikatta bad kumjuh ïa ki nongtrei Anganwadi ban trei ïa ki kam kiba ki ASHA ki ju trei.
Ka Sorkar ka dei ban khot sha ka miej jingïakren ïa ki nongïalam ka Meghalaya ASHA Worker’s Union ban ïa pynbeit ïa ki jingeh kiba mih hakhmat bad ban poi sha ka jingïasngewthuh jingmut khnang ba ki shnong ki thaw kin ym ïakynduh jingeh na ka jingïakhih jong ki ASHA kaba dang bteng haduh mynta.
