Nongpoh, Naitung 19: Ka Dorbar Shnong Umïam ka la pynpaw ba kum ka Shnong kam kwah satia ba ki nongjngohkai pyrthei ne ki briew kiba wan na shabar ka jylla, kin ïohi shuwa ïa ki jaboh ha shwa ba kin poi sha ka Shillong, kaba dei ka nongbah jong ka jylla Meghalaya.
Ïa kane ka la pynpaw da u Assistant Secretary Shnong ka Shnong Umïam, u Imti Chuba Ïawphniaw, haba kren sha ki lad pathai khubor, ha ka jingpynkhuid paidbah ïa ki jaka paidbah hajan ka pung Umïam, ba la lamkhmat da ka Tornado Security Agency ryngkat ka Dorbar shnong Umïam, ha ka 17 tarik u Naitung 2024, kaba dei ruh ka lyngkhuh sngi ïap ba 189 u Syiemt Tirot Sing.
Ka Dorbar Shnong Umïam ryngkat ka kynhun Tornado Security Agency, ki la mih ruh ban ïa pynkhuid paidbah ha kitei ki jaka paidbah hajan ka pung Umïam, ka dei namar ba ka la pynisaitmet ïa ki jaboh ba la bret pathar da ki paidbah bad khamtam naduh ba la sangeh ki Bus ba wan na shabar ka jingjaboh ha katei ka jaka ka la long ka jingsngewkhia ïa ka Shnong Umïam khamtam ba katei ka jaka ka dei ka jaka ba bun ki nongjngohkai pyrthei ki poi ha katei ka jaka.
Haba kren sha ki lad pathai khubor, u Assistant Rangbah Shnong ka Shnong Umïam, u Bah Imti Chuba Ïawphniaw, u la ong ba ka Dorbar Shnong Umïam ka sngewkhia shisha halor ki jaboh ba la mih ha kitei ki jaka, namar ka jylla Meghalaya la tip kum kawei ka jylla ba paw ha ki kam jngohkai pyrthei bad kaba sngewsih pat tang mar ïa poi ha Umïam ki briew kiba nabar ki la ïohi nyngkong ïa ki jaboh, ha kaba ka daw ka long ba ka sorkar kam shim khia ban pynkhuid kaba ktah na ka jingbteng ban maramot ïa ka Jingkieng Umïam.
U la ong ruh kaba kham sngewlyngngoh la bun bnai mynta ka sorkar kam lah ban shna wat ka painkhana paidbah, ha kaba ki briew ki la leit pathar sha ki jaka paidbah bad bret ruh ïa ki jaboh ha ki jaka paidbah bad kane pat ka la ktah ym tang ïa ka burom ka Shnong bad ïa ka burom jong ka jylla hi baroh kawei.
Na ka liang ka Dorbar Shnong ka ai khublei ruh ïa ka kynhun ki Tornado Security Agency, kiba la wan pynkhuid sngewbha ïa kitei ki jaka ba la pynjakhlia da ki paidbah bad kum ka Dorbar Shnong kam kwah ba kitei ki jaka ba hap ha u pud u sam ka Shnong Umïam kin kylla ki jaka ba jaboh kaba long ka jinglehrain ïa ka shnong Umïam.
Shuh shuh, u la khot la wer ruh ïa ki paidbah ba kim dei ban bret pathar ïa ki jaboh ha katei ka jaka ba hap ha pud u sam ka Shnong Umïam bad ha kajuh ka por ruh u la kyrpad ïa ka sorkar ba dei ban leh ei ei ban buh da ki painkhana paidbah bad ruh ïa ki jaka bret jaboh kiba biang, khnang ba katei jaka ha Umïam kan nym long jaboh.
