Shillong, Naitung 18: Ka ïingbishar High Court of Meghalaya mynta ka sngi, ka la shim bishar biang ïa kampynkynriah ïa ki Harijan na Them Iewmawlong.
Ha kane ka jingshim bishar, u nongïasaid na ka bynta ka Harijan Panchayat Committee (HPC), u la ïathuh ba ka HPC ka kwah ban ïapynbeit bad ïasuk noh bad ka sorkar da kaba ïapynbeit hi para ki shabar ka ïingbishar.
Na ka liang ka ïingbishar ruh ka la ailad ïa ki ba kin leh kumta bad ka la pynpaw ruh ba kam sngewdei ba kan shu shim beit ma ka ïa kane ka kam haba kadei ka kam jong ka sorkar.
Ka hukum ba ka la pynmih mynta ka sngi, ka ong ba ka ïingbishar pat ka pynpaw ba kane ka kam ka la slem bad jrong palat bad ka kwah ba dei ban pyndep noh kloi katba lah. Ka la ong ruh ba ha ka sien shong bishar biang ha ka 30 tarik u Nailar mynta ka snem, kane ka kam kadei ban dep noh.
Lah ban kdew hangne ba ka jingpynkynriah ïa ki Harijan na ka jaka ba ki don mynta ha Them ïew Mawlong kadei ka kam kaba la slem shisha, haba ka jingthmu ban pynkynriah shisha ka la sdang naduh u snem 2018, haba la mih ka jingïakhih kabajut ha nongbah Shillong.
Ka sorkar MDA I, ka la thung da ka High Level Committee ba la khlieh da u Bah Prestone Tynsong. Ka Committee ka la aiti ia ka report sha ka sorkar bad ka sorkar ka la pynkhreh ïa ka blue print ban pynkynriah ïa ki. Nyngkong ka HPC ka la pynpaw ba ka pdiang ia kane ka blue print, hynrei hadien ka la kylla ktien da kaba ai daw ba kadei ka jingsngewthuh bakla.
Hynrei mynta ka sngi lyngba kane ka jingpynpaw jong kine ki arliang mamla hakhmat ka ïingbishar ka kam ka lah ban poi sha kaba ïabeit, namar baroh arliang ki la pynpaw ba kin pan jaka wat na ki shipai ruh kiba don hangne ha nongbah Shillong.
