Shillong Naitung 18: Ka Myntri kaba khmih ïa ka tnad Aiñ ka Kong Ampareen Lyngdoh hynne ka sngi Ba-ar, ka la ong ba ki pulit ki dei ban ïeng rangbah triang bad ban shim ïa ka rai kaba skhem ban pynthikna ïa ka jingshngaiñ bad jingïada ïa baroh ki nongshong shnong khamtam haba wat ki MLA ruh kim shngaiñ shuh.
“Wat ki MLA ruh kim shngaiñ shuh. Nga tharai baroh ki tip ïa kata. Ngi la ïohi ba bun ki MLA bad ka ïing ka sem ka jongki ki la shah pynjulor ha kine ki 4 bnai kiba la dep. Kumta ki pulit ki dei ban ïeng rangbah bad ban shim ïa ka rai kaba tyngeh” ong ka Kong Ampareen, kaba ka ïing jong ka ruh ka la shah pynjulor dang shen bad uwei u rangbah briew ula leit ruh ban rung hapoh ïing jongka da ka jingthmu ban shim iaka jingim.
“Ki MLA, ki heh ophisar, ki bor pulit kin hap ban leh ïa kawei ki kam lym kumta kan poi sha kaba bakla bad donkam ban pynbeit ïa kane ka kam, ban pynneh pynsah ïa ka jingshngaiñ kaba long kawei na kiba kordor ha ka jingim” la ong ka Myntri Sorkar bad ka bynrap, “Nga thikna ba u Symbud Myntri Rangbah uba khmih ïa ka kam pohïing u dang khmih ïa ka kam bad ki pulit ruh ki la ïeng katkum ka jingdonkam bad nga sngew ba lada long kumno kumno ruh, ngi hap ban pynbeit ïa kane ka kam”.
Ka Myntri Sorkar kala banjur ïa ka jingdonkam ban pyrkhing ïa ka jingpyndonkam ïa ki rynsan Social Media bad ka ong, “Ngin hap ban leh da kaba tyngeh pyrshah ïa kiba leh tam pud, ngi donkam ban ïa shong bad pyrkhat la ka long kaba donkam ne ka bym donkam ban thaw ïa ki aiñ ki kanun ban tehlakam ïa ka imlang sahlang halor ka jingïoh leh laitlan”.
Ka la ong ba baroh kim dei kiba sniew hynrei ki don ki katto katne kiba pyndonkam bakla bad ngi hap ban trei shitom ban pynthikna kumno ngin pyrkhing ïa ki lym kumta kan synshar ka jingleh kum bym don aiñ bad yn ym lah ban ong pat ba ka sorkar kam shym la leh eiei.
Ha kaba ïadei bad ka jingshah kem jong ki 15 ngut ki thei die met, ka Kong Ampareen Lyngdoh kala ong ba ka kam die met kala long kum ka kam khaïi kaba heh naka bynta ki kynthei.
“Nga sngew ba dei ban pynthikna nyngkong ïa kine ki jingtip baroh bad ki pulit mynta ki la sdang trei bha ban pynthikna ba yn ym don mano mano kiba ïengkai ne ïaidkai shiteng miet. Kano kano ka ban buh ïano ïano ha ka jingma, ngi hap ban long kiba peitngor, ngi hap ban long kiba husiar bad nga tharai ba ki pulit ki la leh ïa ka kam kaba dei bad ngi donkam ruh ban don ïa kiwei pat ki lad ki lynti bad ban pynthikna hashwa ba ngin kam ba kino kino kiba ïeng ha surok ki dei ki nongdie met namar kane ruh ka long kaba bakla” ong ka Kong Ampareen.
Ha kaba ïadei bad ka jingrai ki pulit ban pynjur ïa ka jingpahara ha ka nongbah Shillong, ka Kong Ampareen kala ong ban pynjur palat ïa ki pulit ruh kam long kaba bha bad lada duna palat ruh kam long kaba bha.
“Nga tharai kaba ngi donkam mynta ka dei ba ngin kyntu ïa ki paidbah ba kin long kiba peitngor bha ïalade bad lada ki kwah ban leh kumba ki ju leh, lada ki kwah ban mih shiteng miet ki dei ban nang ban don ruh ïa ka jingkitkhlieh. Nga mut, shisien ba la pyndon bynta ïa ki pulit ban long kiba peitngor kumta kan ym kylla long pynban kum ka jingeh bad to ngin ïa peit bad bishar nangne shakhmat kaei ka ban mih” pynkut ka kong Ampareen.
