Leit ïashim bynta u Conrad ha ka jingïalang ka NDA na Delhi

Shillong, Naitung 18: U Naitonal President jong ka Seng NPP, uba long ruh u Myntru Rangbah ka Meghalaya, u Conrad Sangma u la poi ha nongbah Delhi mynta ka janmiet ban leit ïashim bynta ha ka jingïalang jong ka Kynhun National Democratic Alliance (NDA) kaba dei ka kynhun ba la ïalam da ka Seng BJP.
Ka jingïalang jong ka kynhun jong ki Political Party ba don ha ka NDA, ka long ha kajuh ka por ba ki Political Party bapher bapher kiba don ha ka Liang Pyrshah ki la ïakynduh ha nongbah Benguluru ban ïakren na ka bynta ka elekshin Lok Sabha kaban long ha u snem 2024.
Baroh artylli ki Kynhun ki don mar palat 30 tylli ki Party, kynthup ruh ïa ki Regional Party kiba na ka Dong shatei lam mihngi jong ka ri India.
Na ka NDA ki nongïalam kiba hakhmat ki long u Narendra Modi, Myntri Rangbah Duh ka ri India, u Amit Shah, Myntri Korbar ri, u JP Nadda, President ka BJP.
Ha ka liang Pyrshah don ka Sonia Gandi jong ka Congress, ka Mamata Banerjee jong ka Trinamool Congress, u Nitish Kumar, Myntri Rangbah ka Bihar, u Sharad Pawar nongïalam ka NCP.
La sngewthuh ba ha baroh artylli ki jingïalang ka jingïakren kan long halor ki buit bad ki mat treikam ban leit sha u paidbah na ka bynta ka jingïajied ïa ki MP sha Lok Sabha ha baroh kawei ka ri India.
Ha kajuh ka por u General Secretary ka UDP, u Dr. Jemino Mawthoh,u la kyntait ïa ka jingmih khubor ha Delhi ba ka UDP ruh kadei ka bynta jong ka NDA. Ha ka kyrwoh u Dr. Jemino u la ong ba ka UDP ka don lang ha ka shatri jong ka North East Development Alliance ka kynhun ba ïalam da u Hemanta Biswa Sarma, bad kadei ka kynhun kaba ïatreilang tang na ka bynta ka roi ka par ha kane ka thaiñ.