Shillong, Naitung 18 : Ka General Assembly jong ka Presbyterian Church of India, ka la pynpaw ia ka jingbynniaw halor ka jingslem jong ka suk ka sain ban wanphai biang ha Manipur wat hadien ar bnai shiteng ba don ka jingkynad kaba jur.
Ha ka kyrwoh ba la phah da u Rev. Dr. K Lalrinkima, Sr. Administrative Secretary bad Rev. BB Lamin Moderator, la ong ruh ba ka jingeh bad jingjynjar ki paidbah bad ka jinglyniar jong ki lanot ka la sawa jam hynrei ym don ba iohsngew.
“Kumta, ngi na ka Balang ngi kyrpad jur ia kito kiba don ha ka bor ban shimkhia kane ka jingjia ha Manipur bad tehlakam noh mardor ban iada ia ka jingim ba kordor jong ki paidbah namar ia ka mynsiem la ai da u Blei bad ngi hap ban burom ia ka jingim jong iwei pa iwei,” ong ka kyrwoh.
Ha kajuh ka por, ka Balang ka pynrem jur ruh halor ka jingthombor ia ki shong ki thaw, wiang ding bad lute ia ka jingdon jingem bad thang ruh ia ki iing mane bad pyniap bad pynjynjar sat ia ki nongshong shnong ba lui lui.
Nalorkata, la ong ruh ba ki pynrem jur ruh ia ki jingkynnoh bym hok kaba pyrshang ialam bakla da ki kynhun shimet pyrshah ia kiwei pat da ka thong ban ioh jingkyrshan na ki paidbah.
Na ka liang ka Balang ka kyntu ruh ia ki kynhun ba kynad ba kin wan sha ka miej jingiakren ban wanrah noh ia ka jingiasuk. “Ngi long kiba kloi ban ia donkti lang na bynta ban wallam biang ia ka jingsuk. Ngi duwai ruh ba ka jingjia ha Manipur kan kut noh bad ba ka suk ka sain sa shisien pat kan synshar ia ka jylla Manipur,” pynkut ka kyrwoh.
