Shillong, Rymphang 22: Ka Inter-State Youth Exchange Programme kaba san sngi kaba pynlong da ka Nehru Yuva Kendra Shillong bad kaba la wan ïashim bynta ka kynhun na Mizoram ka la kut noh mynta ka sngi ha Youth Hostel Shillong.
Kane ka prokram kaba la sdang naduh ka 16 tarik u Rymphang ka la don ki bynta kiba ïadei bad ka yoga, ka jingïoh jinghikai shaphang ka ktien, ka jingïasam ïa ka deiriti lyngba ka jingleit jngoh ïa ki jaka ba kongsan ha ka histori bad ki jingpyni ïa ka deiriti kaba la ai shibun kiei kiei ïa ki nongïashimbynta.
Ha ka sngi pynkut, u Sibhi Chakravarthy, Director ka tnad Community and Rural Development, jong ka Sorkar Meghalaya u la wan ïashim bynta kum u kongsan. Ha ka jingai jingkren, u la ïaroh ïa ka NYKS kaba la pynlong ïa kum kine ki prokram, bad u la ong ba kine ki plie ïa ki lad ïa ki samla ban sngewthuh ïa ka deititi bad ka rukom im jong kiwei kiwei ki jaitbynriew.
U la ban jur halor ka jingïatylli wat hapdeng ki jingïapher bad ka jingkongsan jong kum kine ki prokram ban wanrah ïa ka jingsngewthuh kaba kham jylliew hapdeng ki jaitbynriew bapher bapher ha kylleng ka India kaba pynkhlaiñ ïa kane ka jingïatylli.
U la pynshlur ruh ïa ki samla ba kin wad lad dalade bad shim ïa ki lad ba ki ïoh lyngba kine ki jait prokram ba kin sngewthuh kham bha ïa ki jingïapher bad ki jingïahab hapdeng ki jylla.
Kane ka prokram ka la wanrah lang ïa ki samla na ki longïing bapher bapher, kaba la kyntiew ïa ka jingburom iwei ïa iwei bad ka jingsngewthuh ïa ka deiriti bad kaba ïarap bha ïa ka jingïatylli ha ka ri.
