Kut noh ka 2nd Maitshaphrang Inter School Sports & Athletic Meet 2023 jong ka KSU Nongthliew Circle
Shillong, Ïaïong 21 : Ka lympung jong ki jingïalehkai sport kaba la pynïaid da ka Khasi Students union (KSU) Nongthliew Circle kaba la tip kum ka 2nd Maitshaphrang Inter School Sports & Athletics Meet 2023 ka la poi noh sha kaba kut ha ka sngi palei (20-04-2023) ha Nongthliew.
Ïa katei ka jingïalehkai sports, la pynhap pyrda noh da u Bah Hamletson Dohling uba dei u nongaibuit jong u Myntri Rangbah ka Jylla uba dei ruh u Myntri barim jong ka Sorkar Jylla bad MLA barim ka Mylliem Constituency, ha ka jingïadonlang ki nongkitkam jong ka KSU bad kiwei kiwei.
Ki nongjop ha kane ka 2nd Maitshaphrang Inter School Inter School Sports & Athletic Meet 2023, ki kynthup ka Umthlong Nongthliew Govt Secondary School kaba la ïoh rah ïa ka nam lahduh, ka Pyrda Secondary school ka wan ba ar bad ka Seng Khasi Secondary School ka jop kyrdan ba lai.
Ha ka jingïaid March Pass, ïa ka nam ba nyngkong la jop da ka Pyrda Secondary School, ka Umthlong Nongthliew Govt Secondary School ka jop kyrdan ba ar bad ka Seng Khasi Secondary School ka jop ha ka kyrdan kaba lai.
Ha ka jingïalehkai phutbol ïa ka nam ba lahduh ha ka liang ki kynthei la ïoh rah da ka Seng Khasi Secondary School, ka Umthlong Nongthliew Govt Secondary School ha ka kyrdan ba ar bad ka RWR Five Brothers Five Sisters Sec School ka jop kyrdan ba lai.
Ha ka liang ki shynrang ïa ka nam jop ba nyngkong la ïoh rah da ka Nongthliew Area Secondary School, kyrdan ba ar la jop da ka United Christian Secondary School bad ïa ka kyrdan kaba lai la jop da ka Pyrda Secondary School.
Ka KSU Nongthliew Circle ka la pynlong ïa katei ka lympung ïalehkai ka long ban ai mynsiem bad ban kyntiew ïa ki khynnah, ki samla kiba don ka sap ha ka kam ïalehkai bad ruh ban lait na ka jingpep skul noh ba shiteng por jong ki khynnah skul.
U Bah Hametson Dohling haba ai jingkren u la ia khublei ïa ka KSU Nongthliew Circle kaba la shim ïa kane ka sienjam ban pynlong ïa kiba kum kine ki lympung ïalehkai kaba long kawei na ki lad ban ïoh sei ïa ki khun samla kiba don ka sap ha ki jingïalehkai.
U la kyntu ïa ki khynnah skul ba kin long kiba trei shitom khnang ba kin kiew shaphrang ha ki sap ïalehkai ba ki don. U la ai khublei ïa kito kiba la ïoh ïa ka jingjop bad ai mynsiem ruh ïa kito kibym shym la poi sha ka thong, da kaba kyntu ïa ki ba kin ïalehkai bha bad ban buh ka thong ha ka jingim khnang ba ma ki ruh ha kawei ka sngi kin sa long ki nongjop.