Nongstoiñ, Iaiong 21 : Ka St Peter’s Higher Secondary School Pyndengrei, ka la rah ia ka nam lahduh ha ka lympung Chief Minister 28th District Level Inter School Athletic Meet 2023, ba la pynïaid da ka ophis jong ka District Sports Officer West Khasi Hills District, ha madan NDSA Nongpyndeng Nongstoiñ.
Kane ka nam lahduh sha ka St Peter’s HSS ka la jia long namar ka don ha ka ïa ki rang bad thei ïalehkai kiba tbit, kiba la lah ban ïalehkai bha bad khur ruh haduh 17 tylli ki takma Ksiar, 15 tylli ki Rupa bad 12 tylli ki takma Rnong. Katba ka Sib Singh HSS ha ka kyrdan ba ar ka la ïoh 10 tylli ki Ksiar, 14 tylli ki Rupa bad 10 tylli ki takma Rnong.
Ïa ka nam Best Athlete ha ka Under 14 Boys la ioh da u Bobinchal Wanniang na ka St Peter’s HSS, ha ka Under 14 Girls la ïoh da ka Phibapynsuk K.Jana jong ka Anderson HSS. Ha ka Under 16 Boys la khur da u Nicky Mawsor jong ka Anderson HSS, Under 16 Girls la khur da ka Tresha Nongbri jong ka Sib Singh HSS. Katba ha ka Under 18 Boys la khur da ka Shaipharlin Nongsiej jong ka St Peter’s HSS bad na ka liang ki kynthei la ïoh da ka Albamary Sohshang jong ka St Peter’s HSS.
Kumjuh ruh ïa ka nam Best Team na ka liang ki kynthei bad shynrang la rah da ka St Peter’s HSS. Katba napdeng ki 19 tylli ki kynhun jong ki skul kiba la shimbynta ha ka March Pass, ïa ka nam lahduh la rah da ka Jawahar Navodaya Vidyalaya School Nongpyndeng Nongstoiñ.
Lah ban pynkynmaw ba kane ka lympung ba lai sngi lynter jong ki 26 tylli ki skul ka la ïaid beit hapdeng ka jingphuh jingphieng bad hynne ka sngi pynkut, la donlang ryngkat ruh da u DSO barim u ba long mynta u Assistant Director ka tnad ïalehkai ka Jylla, Bah Paia War Nongbri ryngkat I DSO ba mynta I kong Balarina Syiem. Katba I kongsan I dei Additional Deputy Commissioner jong ka West Khasi Hills Kong B.Blah, ha kaba ki la shim ruh ïa ka bynta ban sam ia ki khusnam sha ki nongjop bapher bapher.
Na ka liang I kongsan shwa ban pynhiar noh ïa ka lama, I la pynpaw ïa ki kyntien kyrkhu kyrdoh bad kitbok kit rwiang sha baroh ki nongïashimbynta bapher bapher, kiba la shim bynta shit rhem ha kine ki lai sngi. I kyrmen ruh ba kum kane ka lympung kan long ka jingkyrkhu na ka bynta ki khynnah skul ban pyni ïa ki sap ki phong jong ki ha la ki jait jingïalehkai bapher bapher.
I la ïaroh bad ai mynsiem ruh ïa ka ophis jong ka DSO, ba ka lah ban pyniaid beit ïa kane ka lympung bad kyrmen ba kan nang ban pynlong bad pynbha shuh shuh na ka bynta ka jingmyntoi jong ki samla ïalehkai ka West Khasi Hills District.
