Shillong, Nailur 13: Ka sienjam ba nyngkong (1st) jong ka True North Open Swimming Competition & Masters Meet ka la poi sha kaba kut ha ka sngi Saitjaiñ ha pung jngi jong ka True North Leisure Centre kaba don ha Lapalang.
Kane ka lympung kaba ar sngi lynter ka la pynïasoh lang ïa ki nongïakop jngi na kylleng ka jylla ha ki kyrdan rta bapher bapher, naduh kiba dang 6 snem shaneng. Haba kyllum lang baroh, la pynlong palat 100 tylli ki jingïakop – shimet bad relay.
La wan kongsan ha ka sngi pynkut da u MP ka Rajya Sabha ka jylla Meghalaya u James PK Sangma, uba la sam ïa ki khusnam sha ki nongïakop jngi ba kynsai lane Best Swimmer.
Ki nongïalehkai kiba la khur ïa ka nam Best Swimmer ki long naduh ka kyrdan rta jong ka Category 1 ba la jop da u Theodore J Ch Marak (shynrang) bad ka Hanania E Kharkongor (kynthei) haduh ka kyrdan Senior ba la jop da u Banpynshngain Syngwan, uba la pynkut da kaba khur bun tylli ki takma ksiar.
Kiwei pat ki nongïakop jngi ki kynthup ïa ka Verem Gedaliah Nongsiej, kaba la khur ïa ka takma rnong na ka bynta ka Meghalaya ha ka 1st Khelo India Tribal Games 2026 ha u bnai Lber mynta u snem. Ka la ïashim bynta hapoh ka lama True North bad ka la long ka nongjngi ba kynsai tam (jong ki kynthei) ha ka Category 4.
Kawei na ki khyllipmat kaba pynkhih mynsiem bha ha kane ka sngi ka dei ka jingpyni-sap jong u Iarapborlang Chyne, uba dei u para swimmer. Hadien ba u la duh ïa ka jingkyrshan jong katto katne ki dkhot met namar ka jingjia aksiden, u Iarapborlang u la don ha ka jingpynkhiah ha PMR Centre ha Laban bad u la sdang ban pyntbit ïalade kum u para sprinter. Dang shen u la shim ruh ïa ka jingïalehkai ïakop jngi bad u la ïoh tang hynñiew tylli ki jinghikai ha True North shuwa ban rung shapoh ka pung hynnin ka sngi Saitjaiñ ha kaba u la pyndep ban jngi 25 mitar da kaba sei ryngkat ka backstroke.
Ka la long ka khyllipmat kaba kyrpang na ka bynta baroh kito kiba la sakhi ïa kane bad ka pyni haduh katno ka True North ka long kaba kongsan ym tang ha ka liang ka jinglong ka jaka ban lehkai bad pynjahthait hynrei ban ïoh jinghikai kiba kongsan, kiba pynkylla ïa ka jingim bad ban im ka jingim kaba koit ba khiah.
Kiba khur ïa ka nam Best Swimmer:
Category 1 – Theodore J Ch Marak (male), Hanania E Kharkongor (female)
Category 2 – Issac FC Kharsati & Asher W Lyngdoh (male), Naphisa D Ksoo (female)
Category 3 – Ezra A Khonglam (male), Ira N Wahlang (female)
Category 4 – Meiaipynsan Lyngdoh Tron (male), Verem G Nongsiej (female)
Category 5 – Elhanan J Kharwar (male), Tvisha Jalewa (female)
Category 6 – Shaun M Diengdoh (male)
Senior – Banpynshngain Syngwan (male)
Kiba khur Best Swimmer ha ka Masters:
Category A – William Sangma (male), Glarcenda Z Wahlang (female)
Category B – Rimiki Lyngdoh (male), Mebashisha L Lyngdoh (female)
Category C – Ardonister Lyngdoh (male), Gracia M Diengdoh (female)
Category D – Robert Lyngdoh (male)
Category E – Mario Hek (male), Merry S Syiem (female)
Category F – Keith R Syiemlieh (male)
