Imat ka seng UDP kan kut noh syndon ha kane ka jylla Meghalaya, hato dang don sa kiwei pat ki seng riewlum

U Bah Metbah Lyngdoh, President jong ka seng UDP, ula kyntait war ïa ka khubor jong ka jingleit ïasoh BJP jong ki 9 ngut ki MLA jong katei ka seng trai ri; hynrei ka ju don ka jingong ba ki sla dieng kin ym khih, khlem ka jingbeh ka lyer lane ka tdem kan nym mih, lada kam don ka phliah ding haei re.
U Bah Metbah, u lah ban thaw ktien ha kano kano ka dur, hynrei ka jingshisha ka kren, ba uba pyllait paidbah ïa kane ka khubor, u dei U Sambit Patra, u heh jong ka seng BJP, ha kaba ula ïathuh ïa ka jingïakynduh jong ki MLA UDP ïa U Amit Shah, myntri ka sorkar India ha Delhi bad katei ka jingthoh jong U Patra, kam don daw eiei ruh em, ban ïakren ïa kita ki ishu jong ka FCRA, MRSSA bad kiwei, lada kam don da ka jingmut kaba ïadei bad ka kam saiñ pyrthei lane lada kam dei shisha ruh, ka pyni ba utei u heh BJP, ula shu pynbudnam kai ïa kitei ki 9 ngut.
Donbok ba ka jingkren jong u heh duh ka UDP, kan long kaba dei, hynrei ka wan ka jingkylli ba kumno sha kat ka BJP, kan klet ban buh jingbam bang ha u khwai jongka ban riam ïa kitei ki 9 ngut ki MLA?
Ha kajuh ka por, kane ka dei ka khyllipmat ia U Conrad Sangma, uba dei u heh duh ka NPP, ba un shim khia ïa kane ka mat (kumba ula shong kynjah ha kine ki khyndiat sngi ba ladep, naduh ba ka mih kane ka khubor) bad kata ka long, ba un pyrkhat ban ïatreilang da kaba burom ïa ki MLA UDP, ba un ai shuki myntri kaba biang bad kaba heh ïa ki bad ba un weng noh ïa kine ki symbud myntri rangbah jong u, hynrei un ai noh tang uwei na ka UDP bad lada kan long kumta, khlem pep kane ka jingiakynad kan lah ban dait thah noh kloi.
U Conrad Sangma ïa mynta la ïohi, ba u ñiew burom ïa kito ki MLA kyntiap seng, kiba leit rung sha ka NPP, hynrei u dei ban kynmaw, ba ha ka por ba ka NPP kam don ka jingbiang briew kaba pura ha u snem 2018, ka dei ka UDP kaba pynlong Myntri rangbah ïa u (wat la um dei satia tang U MLA ha katei ka por), hynrei la ïohi, ba une u samla rangbah, ula klet noh kloi ïa katei ka mat bad mynta ula pynlong jingsar kjat ïa katei ka seng, kaba la pyllait ïa u na ka saw ka sian.
Ka por kam shah slem bad u Conrad Sangma lem bad u bah Metbah Lyngdoh, ki dei ban ïakynduh kyrkieh ban ïakren ïa kane ka mat, hynrei lada jia ba ki bakla ka phormula ha kane ka kynti, kumta ka bor jong ka BJP, kan khynra shwa ïa ka UDP bad mar ïa dep ia ki 9 ngut jong ka UDP, kan khynra syndon sa ïa ka NPP bad ka sorkar ha shwa ka elekshon 2028, ka la ka thikna ba kan dei ka sorkar BJP.
Shuh shuh ha kaba ïadei bad kane ka saiñ hima sima ha ka jylla ka la nangpaw shuh shuh ha kine ki sngi hadien ba la ïohi ba u Dr. Jemino Mawthoh u la rung ïalade sha ka seng BJP ha ka sngi saitjaiñ ha kaba la ïohi ruh ïa ka jingwan ban shim bynta jong kiba bun ki riew paw khmat bad kumjuh ruh ki nongïalam kiba don lang hakhmat jong u.
La ïohi ruh ba ka ophis BJP ka la dap da ki briew bad ki nongkyrshan kiba la wan ban ai mynsiem ïa u kum u nongïalam bad ka jingkylli kaba mih mynta kan long ba hato ka UDP kan khie khlieh ha kine ki por kiba mynta naba la ïohi ba bun na ki nongïalam jong ka kin kynthih diengpker lada don kano kano ka lad ha kum kane ka por kaba mynta.
Kumba la ïohi ba bun na ki nongpeit pyrman ha kien ki sngi ki la ïohi lypa ïa ka jingma ha kaba ïadei bad kane ka bynta naba bun na ki nongïalam jong ka ki la sdang ban mih noh na kane ka seng.
Watla bun na ki heh jong ka seng kim pat lah satia ban pynshai bha halor kane ka kam hynrei lyngba ki dak ki shin ba la iohi kane ka seng kan ym shym lah shuh satia ban khieh khlieh bad kumba ka long mynta ka shong sa ha kiwei pat ki nongialam jong kiwei pat ki seng riew lum ba kin pynkhlaiñ ïalade ha kaba ïadei bad kane kam saiñ pyrthei ha kane ka jylla.
Haba ïaid sharum shaneng kiba bun na ki briew mynta ki la ïalap ba dei sa tang ka seng VPP ka ban dang lah ban khih khlieh ha kane ka saiñ pyrthei kaba mynta hapoh ka jylla Meghalaya naba ym ki don shuh sa kiwei pat ki seng ki ban dang lah ban mih khmat bad kiba lah ban pynurlong ïa ki jingeh jong ki paidbah ha kane ka juk kaba mynta.