Shillong, Naitung, 28: Ki shipai BSF jong ka 110 Battalion, Meghalaya kiba la ïoh ïa ka jingtip kaba bniah ha ka Sngi Saitjaiñ ki la pynlong ka jingap ktem bad ïoh kurup 58 ki muid ba la thep ha ki ar tylli ki drok na surok Ichamati- Shella, East Khasi Hills, ïa kiba la thmu ban shalan be-aiñ sha ka ri Bangladesh.
Marmar la kurup noh ïa kine ki muid bad la aiti noh sha ki bor Pulit ba kin leh ïa kaba donkam.
Ha kawei pat ka jingkhynra ki shipai BSF jong ka 193 Battalion ki la ïoh kurup 30 tylli ki masi na khappud jong ka East Khasi Hills katba ki snar nongkhaii ki dang thmu ban shalan be-aiñ sha Bangladesh. Ïa kine ki masi la aiti noh sha ki Pulit ka Dangar Police Station ban leh ïa kaba donkam.
Ki shipai BSF kiba la pynjur ïa ka jingpeitngor bad ka jingpahara ha khappud jong ka ri India bad Bangladesh ki la ïoh kurup haduh 2000 tylli ki masi na ki bynta bapher bapher jong ka khappud ka Jylla Meghalaya naduh u bnai Kyllalyngkot, 2023.
