Shillong, Naitung 28 : Ka Shillong Municipal Board (SMB) ka dang wad ïa ki jaka ban phah shong ïa ki nongdie madan kum shi bynta ban pynkylluid bad ban pynkylla ïa ka thaiñ Khyndai Lad tang kum ka jaka ïaid kjat.
ïa kane la pyntip da u Myntri ka tnat Tourism bah Paul Lyngdoh haba ïakren bad ki lad pathai khubor haba pyntip ba kiei kiei baroh ki la ïaid beit ïaid ryntih.
“Ban pynlong ïa ka Khyndai Lad kum ka jaka ïaid kjat, ki kam ki jam ki la ïaid beit ïaid ryntih bad ka jingeh mynta ka kynti ka long tang ban ïoh jaka na ka bynta ban ai shong dukan ïa kumba 100 ngut ki nongdie madan kiba la pynrung kyrteng bad ka SMB ka dang leh mynta ïa kaba donkam” la ong u bah Paul.
U bah Paul ula ong ba ka sorkar kan nym beh ïa ki nongdie madan khlem da pynïoh jaka ïa ki ba kin ïoh bteng ïa ka ïadie ïathied lane ka khaïi pateng bad nalor kane ka sorkar jylla ka hap ruh ban bud ryntih ïa ki aiñ ka sorkar pdeng (National Act) haba ïadei bad ka bha ka miat ki nongdie madan.
“Ngin pynbiang jaka ïa ki nongdie madan ha shuwa ban pynkylla ïa ka Khyndai Lad kum ka jaka ïaid kjat bad katkum ki aiñ ka sorkar pdeng (National Act), ngi dei ban pyndep ïa kane hapoh u bnai Risaw 2023” ula ong.
Nalor kane u bah Paul ula ong ba ka sorkar ka hap ban ai jaka shawei ïa ki nongdie madan namar lada shu kyndang beit naphang ki nongdie madan ki lah ban leit ujor sha ïing bishar bad kane kan sa ktah ïa ka jingthmu ka sorkar ban pynkylla ïa ka Khyndai Lad kum ka jaka ïaid kjat.
