Shillong, Naitung 29: “Ngam pat ju ïoh sngew ba don kiba pyrshah ïa ka jingpyntreikam ïa ka National Education Policy (NEP) 2020 hynrei nga la ïoh sngew pat ba don kiba pynsngew ba ki shem jingeh namar bun ki daw” ong u Myntri Rangbah u Conrad K Sangma.
ïa kane u la pynpaw halor ka jingdon kiba pynpaw ïa ka jingsngewdiaw ban pyntreikam noh mar mar ïa ka NEP naduh u bnai Nailar 2023.
“Ki daw ban pynlong ïaki College ha Meghalaya ban shem jingeh ban pyntreikam ïa ka NEP naduh mynta u snem ki kynthup ïa ka jingpynrung noh ïa ka jingpule Undergraduate ba saw snem, jingdonkam ki jingtei, ka jingdonkam bun ki professor bad ki tnat pule (Multidisciplinary) bad kane kan ïalam sha ka jingdonkam ban bei tyngka” la ong u Conrad.
U Conrad ula ïathuh ba ka sorkar ka la ïakren bad ki College bapher bapher hapoh ka jylla ban ïaphylliew jingmut kumno ka sorkar ka lah ban ïarap ïa kine ki College ban pyntreikam ïa ka NEP, la ka dei ha ka liang ban bei tyngka, ban ïarap ïa ki jingtei (Infrastructure) bad kiwei kiwei de ki jingdonkam.
“Ki College ki la pynpaw ba dang donkam khambun ki Professors, Lecturers, jingtei (Infrastructure) bad dei namar kane nga ong ba ka jingkylli kam mih ba ki pyrshah ban pyntreikam ïa ka NEP hynrei ka dei tang ba ki shem jingeh khamtam ha kaba ïadei bad ka mang tyngka” ula ong.
U Conrad ula kubur ba ki don shi bun ki College bad ki stad ha ka pule puthi (Academicians) kiba la ai ka jingïaroh ïa ka NEP da ka ba ong ba kane kan ïarap shisha ban kyntiew ïa ka Pule Puthi hapoh ka jylla bad haka juh ka por kan pynkhreh ïa ki samla na ka bynta ka lashai.
“Ha nga shimet nga sngew skhem ba dei ban ïaid shakhmat ha ka ban pyntreikam ïaka NEP watla kin don shi bun ki jingeh hynrei ka sorkar kan ïatreilang bad ki College ban pynurlong ïa kane. Hooid ngim lah ban pynbeit lut ïa ki jingeh shisien leh hynrei hadien ha bud nga ngeit skhem ba ka jylla kan sa jop haba ïadei bad ka jingpyntreikam ïaka NEP” ula ong.
