Shillong, Naitung 28: U Myntri ka tnat kam jngohkai (Tourism) bah Paul Lyngdoh hynne ka sngi Thohdieng, ula kyntu ïa ka tnat kam pohïing (Police) ba kan thwet ïa ki dkhot ka seng Legal Rights Observatory (LRO) kiba donkti ban pynthoh bria ïa ka Meghalaya kum ka jylla kaba pyrshah ïa kiwei ki briew kiba wan shapoh kane ka jylla.
“Nga kwah ban kren shai ba kane ka seng LRO ka dei ka seng kaba don jingthmu ban pynthoh bria ïa ka jylla da kaba kam ba ka Meghalaya ka dei ka jylla ba ki nong shong shnong ki dei kiba shun bad kiba pyrshah ïa kiwei pat ki briew ban wan shapoh kane ka jylla khnang ba kiwei pat ki briew na kiwei ki jaidbynriew kin nym wan shuh sha ka jylla” ong u bah Paul.
U bah Paul ula ong ba kan dei ka kamram jong ka tnat kam pohïing (Police) ban thwet ïa kane ka seng ban ïada ïa ka Meghalaya na ka jingshah pynthoh bria ha kum kine ki briew kiba don ka jingthmu ban pynjot ïa ka jylla.
Ula ong ba ka jingwan ki briew ha Meghalaya ha ka shisnem ka poi haduh 15 lak ngut eiei bad kane ka dei ka sakhi ba ki briew kiba wan sha Meghalaya ki ïohi ba ki paidbah nongshongshnong ki long kiba sngewtynnad, kiba ïatreilang bad kiba pdiang ïa kino kino kiba wan kai sha kane ka jylla.
“Nga la bthah ruh ïa ki ophisar ka tnat Tourism ban pynpaw beit hapoh ka Website jong ka Meghalaya Tourism ba ka jylla ym tang ba ka long kaba shngaiñ hynrei ka dei ruh kawei ka jylla kaba khring bha ïa ki nongwan shangkai pyrthei” ula ong.
