Shillong, Naiwieng, 25: Ki shipai BSF ka Meghalaya ha ka sngi Thohdieng ki la pynpulom ïa ka jingthmu jong ki runar ban khaïi tuh ïa ka shini na u pud u sam jong ka ri India bad ïa kiwei kiwei ki mar khaïi kiba shongdor haduh 11 lak tyngka ïa kiba la thmu ban shalan sha ka ri Bangladesh.
Hadien ba la ïoh ïa ka jingtip kaba bniah na ki tnat syntiat, ki shipai BSF jong ka 200 Battalion ki la pynlong ka jingkhynra ha khapud jong ka Dambukaphal, West Garo Hills District. Ha kane ka jingkhynra ki shipai BSF ki la ïoh kurup 5000 kilo ka shini India ba la thmu khaïi be-aiñ sha Bangladesh.
Ha kajuh ka por, ha kawei ka jingkhynra ki shipai BSF jong ka 110 Battalion Meghalaya ki la ïoh khang kdong ïa kawei ka trok Pickup ha khappud Kasinda, East Khasi Hills District, kaba kit ïa ka shini ba la thmu ban khaïi sha ka ri Bangladesh.
Ïa kine ki mar khaïi ruh la aiti noh sha ka ophis Custom ban leh ïa kaba donkam katkum ki kyndon jong ka aiñ.
