Ka Sorkar ka trei da ka mynsiem ban ai jingshakri sha ki paidbah, ong u Myntri Khynnah

Shillong, Naiwieng 25 : U Myntri Khynnah ka Tnat Micro, Small and Medium Enterprises, u Bhanu Pratap Singh Verma mynta ka sngi u la ong ba ka Sorkar ka trei da ka mynsiem jong ka jingai jingshakri.
U la ong ïa kane ha ka prokram Viksit Bharat Sankalp Yatra ba la pynlong ha ka shnong Laitkseh kaba hap hapoh ka Mawryngkneng Block jong ka East Khasi Hills District, Meghalaya.
“U Myntri Rangbah Duh ba shemphang jong ngi u niewkor bha ïa ki briew kiba shem jingeh,” la ong u Myntri. U don ka jingsngew jan ïa ki briew kiba shem jingeh namar ki jingshem ha ka jingim jong u bad u la ong ba ka Sorkar ka niewkor tam ïa ki bad ki don ki sienjam ban pynthikna ba ki ïoh ïa ki jingshakri ha ki jaka ba ki sah.
U Myntri u la ong ba kane ka thain kam pat ju ïohi ïa ka roi ka par kumba la wan ha kine ki khyndai snem ba la dep. U la ong ba ka rukom treikam jong ka Sorkar ka la wanrah ïa kane ka jingkylla. U Myntri u la pyntip ruh ba ka Sorkar ka don ka jing thmu ban don ka jingkhuid
kaba salonsar ha baroh ki shnong. Ha ka jingkren shaphang ki jingjop hadien u snem 2014, u Myntri u la ong ba ki connection LPG ki la kiew na ka 50-55% ki shnong sha kumba 100% mynta, baroh mynta ki ïoh ïa ki dawai tika na ka bynta ki khynnah, ka jingïoh ïa ka um kor ha iing ka la kiew bun bun shah ha kine ki khyndai snem ba la dep, u la ong.
Ha ka jingbatai shaphang ka nongrim jong ka ‘Viksit Bharat Sankalp Yatra’ u la ong ba ka hok ha ka imlang sahlang ka wan tang haba ki jingmyntoi na baroh ki skhim Sorkar ki poi sha baroh ha kajuh ka rukom. Ha kane ka Yatra, ka Sorkar kan leit sha baroh ki shnong jong ka ri ha ka rukom treikam mission mode bad kan pynlong ba baroh kiba shem jingeh kin ïoh ïa ki jingmyntoi na ki skhim Sorkar, la ong u Myntri.
U Myntri u la ong ba u ngeit ba kan don ka jingpynpoi 100% ki skhim Sorkar bad u la ong ba u ap khmih lynti ïa ka sngi ha kaba baroh kiba duk ba suk kin don ki card ban ïoh ei ïa ki mar bam, ka gas connection na ka skhim Ujjwala, ka bording elektrik ha ki iing jong ki, ka um kor, ka Ayushman Card bad ka iing kaba bïang. U Myntri u la kren ruh shaphang ka jing
thmu jong u ba baroh ki nongrep bad ki nongbylla kin don hapoh ki skhim bai bam tymmen bad ba ki samla ki ïashim bynta ha ka Mudra Yojna ban pynurlong ïa ki jing thmu jong ki.
“Ka Viksit Bharat Sankalp Yatra ka dei ka jingpynthikna u Narendra Modi na ka bynta kiba duk ba suk, kiba shem jingeh, ki longkmie, ki samla bad ki nongrep jong ka Indïa,” u la
bynrap.
U Verma u la kren kyrpang shaphang ka PM Vishwakarma Yojana bad u la ong ba kane ka skhim ba thymmai ka pyni ba ka Sorkar Pdeng ka ieng skhem na ka bynta ka jingplie lad ïa ki sap jong baroh ki briew ha ka jingïaid lynti sha ka Indïa kaba la kiew shaphrang. U la ong ba kane ka skhim kan ai ki atïar jinghikai katkum ka juk mynta sha ki paralok Vishwakarma. U Myntri u la ong ba u ngeit skhem ba ki saw tylli ki Amrit Stambh jong ka Amrit Kaal kiba long ka bor jong ki longkmie, ka bor jong ki samla, ka bor jong ki kam rep bad ka bor jong kiba duk ba suk bad kiba pdeng ka ïoh ka kot kin ïalam lynti ïa ka Indïa sha ki klïar kiba thymmai bad kin pynkylla ïa ka Indïa sha ka ri kaba la kiew shaphrang.
U Myntri ka Tnat Animal Husbandry and Veterinary jong ka Sorkar Meghalaya, u Bah Alexander Laloo Hek ha ka jingai jingkren jong u, u la ong ba ka Sorkar ka la pyntreikam ïa ka Direct Benefit Transfer (DBT) ban weng ïa ka jingmushlïa ki briew bad ban tehlakam ïa ka jingjah pisa da ka jingïarap jong ka teknoloji. Ki jingkylla ha ka rukom synshar ba la wanrah da u Myntri Rangbah Duh, u Narendra Modi kim sahkut tang ha ki kam synshar hynrei ki wanrah ïa ki jingseisoh ha ka imlang sahlang bad ka ïoh ka kot ruh. U Bah Hek u la ong ba ki bun bha ki skhim hapoh ka tnat Animal Husbandry and Veterinary bad ka tnat Fisheries kiba ai jingmyntoi ïa ki nongrep kum ka Aquaculture Mission, Poultry Mission and Piggery Mission. U la ong ba ki nongrep ki lah ban shim ïa ki skhim bad ki prokram bapher bapher ha kaba ka subsidy ka long kaba heh bha. “Ngi ieng skhem na ka bynta ka jingkyntiew ïa ka ïoh ka kot ha ki jaka nongkyndong,” u la ong.
La don ruh ki prokram ‘Jan Bhagidari’ bapher bapher kum ka jingïathuh ki briew shaphang ki jingshem jong ki shaphang ki skhim Sorkar Pdeng hapoh ka Mere Kahani Meri Zubani, ka jingpyntreikam pura ïa ki skhim kum ka Ayushman Bharat, Jal Jeevan Mission, Jan Dhan Yojana, PM Kisan Samman Nidhi Yojana, ODF Plus status, ka jingpyni ïa ka jingpyndonkam ïa ki drone ha ki kam rep, ki health camp bad kiwei kiwei. Ki nongshong shnong ki la wan shakhmat ban ai jingtip shaphang ki jingshem jong ki haba ki la shim ïa ki skhim Sorkar.
Ka Kong Baphira Nongdhar, ka nongrep na ka shnong ka la ong ba ka ju trei kum ka nonghikai ha ka skul shimet hynrei ka la ieh noh ïa kane ka kam ha u snem 2009. Ka la phai sha ka kam rep ban kamai jakpoh. Ka la ïoh shibun ki jingmyntoi na ka Krishi Vigyan Kendra. Ka la ïoh ïa ka solar water pump bad ka jinghikai ha ka jingrep tit, ka kam rep ka bym pyndonkam dawai bad ki rukom tehlakam ïa ka jingpynjulor ki khnïang ïa ki mar rep.
Ka dei ka dkhot na ka shnong na ka bynta ka State Seed Production. Ka dei ruh ka nongthung phan kaba la kyntiew kyrteng ïalade. Mynta, ka kong Nongdhar ka pyndonkam ïa kane ka solar water pump ha ka jaka rep jong ka bad kam pyndonkam ïa kiwei kiwei ki lad pynpoi um sha ka jaka rep jong ka.
Ka Kong Markun Marboh pat ka la ong ba ka la shna ïa ka iing jong ka lyngba ka PM Awas Plus Yojana ha u snem mang tyngka 2021-22. Ka la pyndep ïa kane ka iing hapoh 95 sngi katkum ki kyndon. Ka la ïoh T. 1.3 ban shna ïa kane ka iing. Ka don ïa ka job card bad ka la ïoh palat T. 26,000 lyngba ka MGNREGA ban shna ïa kane ka iing. Ka la ïoh ïa kane ka T. 1.3 lak ha ki lai tylli ki bynta – T. 52,000 ha ka bynta kaba nyngkong, T. 58,500 ha ka bynta kaba ar bad T. 19,500 ha ka bynta kaba lai. Mynta ka sngewkmen bha ba ka la lah ban shna iing ïa ka longiing jong ka bad pynbïang ïa ki jingdonkam ha kane ka iing. Kan sa ïoh ruh ïa ka um kor lyngba ka Jal Jeewan Mission. Ka la ïoh ruh ïa ka tyndong gas lyngba ka Pradhan Mantri Ujjwala Yojana bad shen, ka iing jong ka kan sa bïang lut ha baroh ki bynta. La pynbïang ruh ïa ka painkhana ha kane ka iing lyngba ka Swachh Bharat Mission.
Ka Kong Mithilda Kharumuid kaba dei ka dkhot jong kawei ka Self Help Group kaba tip kum ka Mynjurlang ka la ong ba ki la ïoh jingmyntoi na ka National Rural Livelihood Mission. Ka Mynjurlang ka dei kaba pynmih ïa u shynrai. Man ka taiew, ki dkhot jong kane ka kynhun ki thep T 10 ha ka account jong kane ka kynhun. Ki la thied ïa u shynrai da kane ka pisa. Ki la ïoh ruh ïa ka grant kaba T. 15,000 na ka Block. Kane ka SHG ka pynshlur ruh ïa kiwei kiwei ki longkmie ba kin ïasnoh kti lang bad ki khnang ba ki ruh kin ïoh ïa ki jingmyntoi kum ki jinghikai ha ki kam kiba ïadei bad ka pisa.
U Myntri u la sam ruh ïa ki certificate sha ki nongïoh jingmyntoi na ka PMAY-Gramin bad Pradhan Mantri Ujjwala Yojana. Ka la don ruh ka drama halor ka phang Dharti Kahe Pukar Ke kaba ai jingbatai shaphang ka rukom rep tynrai, ka jingïada ïa ka marïang bad ka koit ka
khïah ba la pyni da ki dkhot ka Self Help Group kaba la khring bha ïa ki nongshong shnong.