Jowai, Naiwieng 25: Ka kong Isawanda Laloo, IAS kaba dei ka Electoral Roll Observer hynnin ka sngi kala wan sha nongbah Jowai ban pynlong ïa ka jingïakynduh bad ki ophisar ka tnat Election kumjuh ruh ïa ki nongmihkhmat jong ki kynhun saiñ hima sima ha ka jingïadei bad ka jingïaid beit ïaid ryntih ka rukom pynbit pynbiang ïa ki Electoral Roll kiba ïadei naduh ka rukom pynrung kyrteng, ka jingpynbeit kyrteng ne ka jingkynriah jaka bad kiwei de hapoh ka West Jaiñtia Hills District.
Ka kong Isawada kala ïoh ban pynlong ïa ka jingïalang bad ki Electoral Registration Officer (EROs), ki Assistant Electoral Registration Officer (AEROs) jong ki san tylli ki Assembly Constituencies kiba kynthup ïaka1-Nartiang, 2-Jowai, 3- Raliang, 4-Mowkaiaw bad 7-Amlarem Assembly Constituencies hapoh ka kamra treikam jong u Deputy Commissioner, West Jaiñtia Hills District, Jowai.
shuh shuh ka kong Laloo kala pynlong sa ïa ka jingïakynduh lang bad ki nongmihkhmat jong ki Political Party bapher bapher ha kaba ki la ïoh ban ïakren ne phylliew jingmut ïaka rukom ïaid beit ïaid ryntih ka Electoral Roll hapoh ka District. Ka la kyntu ruh ïaki nongmihkhmat jong ki Political Parties ba kin buh ne thung ïa ki Booth Level Agents, na ka bynta ban kham suk shuh shuh ka rukom trei kam hapdeng ka ophis jong ka Election bad ki Political Parties.
Ha kane ka juh ka sngi ka kong Laloo ila pynllait paidbah ruh ïa ka video lyngkot shaphang ka SVEEP (Systematic Voter’s Education and Electoral Participation) kaba ïadei bad ka Special Summary Revision (SSR) ïa kaba la pynbit pynbiang da ka kynhun “CHI IUNG”.
