Khliehriat Lber 15 : Ki pulit East Jaiñtia Hills District, mynta ka sngi ki la ïoh ban kurup ïa u drok herion ba khia 32.5 gram bad ki la bat noh ïa ki lai ngut ki briew kiba la tip kyrteng kum u Rudolf Franklin, 28 snnem kyrta, u Aibankyrshan Kharlyngdoh, 24 snem kyrta bad u Shemphang Lakhiat, 29 snem kyrta, kiba na Ri Bhoi District.
Ki pulit ki la kurup noh ruh ïa kawei ka kali maruti car kaba don u registration number ML-05-D-3783, ka pisa T54,150 tyngka bad lai tylli ki mobile phone.
La ong ba ki pulit, ki la ïoh jingtip ha ka por 2.30 mynstep ba kitei ki lai ngut ki la mih da katei ka kali maruti car na Silchar bad ki thmu ban leit sha Umsning, Ri Bhoi District bad ki la kit lang ruh bad ki ïa ki drok, kumta hi mar mar ki pulit ki la pynap ktem bha ha surok national highway-6, hajan ïew Ladrymbai, kumta hi ha ka por kumba 3 baje mynstep, ki la ïoh ban khang kdong ïa katei ka kali , haba la khynra bad talasi, ki pulit ki la lap na katei ka kali ïa ki drok ba long power rong stem, rong soh bad hadien ba la test la ong ba ki dei ki drok herion, ïa kitei ki drok la song ha ki synduk sabon ba la sop bha khop.
Ïa ka case la register ha Khliehriat Police Station hapoh ki kyndon aiñ NDPS Act bad ka jingtohkit ka dang ïaid shakhmat ban lap shuh shuh ïa kiba donkti kiba la ïaid sha khmat bad kiba dang don shadien.
