Nongstoiñ, Lber, 15: Tang kumba 14 sngi hadien ba ka sorkar ka la dep pynbna ïa ka resol jong ka elekshon bad ba u bah Goldenstar Nonglong u ba la ïakhun kum u kyrtong na ka party Congress na ka 33 Rambrai Jyrngam um shym poi sha ka thong. Hynrei, ha ka sngi balang, u la lum ïa ki nongkitkam jong ki zone, ki primary unit bad ki sub unit na ka constituency ha Congress Bhavan New Nongstoiñ ban ïakynduh lang bad ban ai khublei ïa ka jingtrei shitom jong ki ba ki la lah ban pynïoh haduh san hajar tam ki vote.
U bah Goldenstar Nonglong u la pynpaw ïa ka jingsngewnguh bad ka jingkhublei kaba kyrpang ïa baroh ki paitbah nongkyrshan, kiba la trei shitom met bad mynsiem na ka bynta jong u wat la u dang long u ba thymmai ha ka Constituency ruh. Nalor kata u bah Nonglong u la ong ruh ba ka jingïoh vote jong u ha kane ka MLA election ba la dep, ka pyni shai ba ki paitbah jong ka Rambrai Jyrngam Constituency ki ieit bha ïa ka Congress.
Hynrei ka jingbym poi sha ka thong ka dei namar ki la pynleit jingmut palat ba ka jingïaleh ka long beit tang ïa u kyrtong ka NPP bad ka HSPDP, katba kim shym poi pyrkhat ba u kyrtong shimet u kham khlaiñ ban ïa kitei ki ar ngut. U bah Nonglong u la ong ba ka jingshah rem ha kane ka elekshon MLA, ka long ka jinghikai ha ki snem ban wan ba kim dei ban kheiñ sting ha ka jingïaleh, namar ba u kyrtong u ba kim shym poi pyrkhat u poi sha ka thong. Ha kajuh ka por u la ai khublei ïa u bah R.G.Momin kum kyrtong shimet u ba la jop bad u la kyntu ruh ïa u ba u dei ban trei bha ïa ka constituency ha kine ki san snem.
Ha ka jingïalang la ïatai bad ïathir sani bha na ka bynta ka election MDC ka ban sa long ha u snem ban wan. Ha ka jingïatai bad ka jingïapyni jingmut kaba la ïa shim bynta da kiba bun ki nongkitkam, ka sur kaba mih ka long ba u bah Goldenstar Nonglong u dei ban ïaleh biang kum u MDC. Hynrei na ka liang jong u bah Nonglong u la kyrpad jur ba na ka bynta ka election MDC ki nongkitkam bad ki nongkyrshan kim dei ban pynbor ïa u.
U la ong ba la kumno kumno ha ka election MDC dei ban phah ïa ka kyrteng jong u bah Bormanding Nonglang kum u kyrtong, namar u la long ruh u nongkitkam u ba la shakri ïa ka party la bun phew snem. Watla ka la don ka jingkyrpad na kiba bun ki liang ba u bah Nonglong u dei ban ïaleh hi ,hynrei u la ïai pynsngewthuh ba wat lada um ïaleh ruh un ym iehnoh ïa ki paitbah ka Rambrai Constituency.
U la ong ba un don ha syndah bad u bah Bormanding Nonglang ha ki por baroh bad kaei kaba u bah Bormanding u thmu ma u ruh un mynjur lang. Ha kaba khatduh ka sur kaba mih na ka jingïalang ka long ba da kawei ka jingmut kin pynïaleh da u bah Bormanding Nonglang kum u MDC.
