Ka jingpynthikna ïa ka jingim ne ka Life Insurance Policy kadei kawei na ki buit treikam ban ïarap ïa ngi ki briew ba ngin lait na kino kino ki jingngat ha ka khim khait lada jia kano kano ka ka jingjia ba sngewsih, na ka jingkhlad kyndit kaba khlem pat dei por ne bympat biang ka jingpynkhreh. Kane ka buit trei kam ka dei shi bynta jong ka rukom kynshew kaba ngin ym lah ban pyndonkam noh ïa ka kat ba kam pat dei ka por ba ka jingbuh ne ka jingkynshew ka la pura por. Kane ka jingkynshew ka don lypa ïa ka thong kaba long kat kum ka rta jong kita ki nongshimbynta bad ka lah ban long naduh 5 haduh 40 snem ei ei. Ka jingheh jong ka jingsiew kan long kat kum ka dor jong ka jingkynshew kaba lah ban long na ka lak, ka phew lak bad shaduh ka klur ruh kumjuh ha kaba kut jong ka thong ba la buh. Hynrei lada jia ryngkat u/ka nongkynshew ki khlad noh tang hadien khyndiat bnai ne snem bad ba ka jingkynshew jong ki kam pat kot sha kata ka thong ba la mang, hynrei kita ki nongïohpateng jong ki kin ïoh beit pura ïa ka jingmyntoi kumba la dep ban mang ha ka thong.
Hynrei haba phai sha ka jaidbynriew jong ngi ka long kaei kaei kaba duhnong namar ba ngi dang ïa im ha ka jingngeit barim ba ki ju ong ba la long pynban ka jingpan kwah. Kumta kiba bun ki briew jong ngi kim ju shlan ban buh ne kynshew ha ki Life Insurance Policy ne kiwei pat ki Insurance Policy ba lah ban ïadei kum ka jingpluh ding, ka jingshah tuh bad kiwei pat. Lait noh tang ka Insurance kali kaba ym lah ban lait da baroh ki nongbuh kali, hynrei ïa kiwei pat ki jait Insurance bun hi ki dang ïa khohñioh bha ban kynshew ha kiwei pat ki Insurance Policy. La katta ruh ha kine ki sngi kiba bun kim lah hi ban lait na ka Life Insurance Policy khamtam kito kiba shim ram na ka sorkar ne na ki Bank. Ka Life Insurance ka ïarap ïa ki nongshimram ba kin lait na kano kano ka jingshah khnieh noh ïa ki mar ki mata ne ki jingdon jongki kiba ki lah ban thied ne tei lyngba jong ka ram. Wat lada jia ba ki khlad kyndit kynsan ruh ki khun ki kti jong ki kin ym ngat ha ka jingeh jong ka jingshah khnieh noh ïa kita ki tiar ba la tei ne thied lyngba jong ka ram.
Hooid ka jingim briew ka long shisha ka bym thikna bad ka jingïap te ka dei kaba la thikna beit namar kata kawei ka ka ‘tien phira jong ka Lice Insurance ka long, ka kali ka lah ban ym ïakynduh ïa ka jingtyngkhuh ne aksiden, ka ïing ka lah ban ym pluh ding, ka lah ban ym don ka jingshah tuh bad kumta ter ter, hynrei ka jingim u briew u dei ban ïap beit, namar kata ki donkam ïa ka Life Insurance khnang ba ka jingïap jong ki kan ym long kaba thylli, hynrei lada ki don ïa ka Life Insurance kan ai jingkyrshan ïa ki longdien jong ki wat hadien ba kila khlad noh ruh. Dei na kata ka daw ba ngi lah ban ïohi ba kiwei pat ki jaidbynreiw khamtam lei kito kiba im sha ri thor ki shim khia bha ban don ïa ka Life Insurance Policy bad kim ju pud ruh ban pynbiang ïa ka jingkyshew jong ki man la u bnai khnang ba ki longïing jong ki kin ym don kano kano ka jingeh lada wan ka jingjia ba sngewsih.
Kane ka Life Insurance ka dei eh tang ka jingkynshew na ka bynta ban pynkhreh ban ïakynduh ïa ka jingïap, hynrei kiba bun ki briew kiba sumar bha ïa la ka jong ka jingim, ki ïoh ïa ka lad ban leh kmen na ka jingmyntoi ha kaba kut jong ka thong ba la buh por ruh. Kane ka jingkynshew ha ka Life Insurance ka ai khambha ka sut ne ka jingmyntoi ban ïanujor ïa kata ka sut ne ka jingmyntoi ba ki Bank ki ju ai. Ki briew kiba nang ban kynshew ki ïoh wat ïa ka lad ban ïoh seng ïohdang ruh ha ka por ba ki ïoh ban sei noh ïa ka jingkynshew jong ki ha ka por kaba la pura kaba ki ju khot kata ka Survival Benefits.
Ka jingkynshew ha ki Insurance Policy ka long ka jingïarap kaba donkam bad ka lah ruh ban kyrshan ïa kito ki longïing kiba don jingeh, lada ki lah ban sngewthuh bad shim khia ban kynshew. Ka jingap ba katto katne snem kan long ka jingmyntoi ha ka por ba ki nongbuh ne nongkynshew kin ïoh ban sei ïa kata ka jingtrei shitom jong ki ha kaba kut jong ka por. Ka long kaba donkam bha ïa ki Insurance Office ban thung ïa ki breiw kiba don ka jinglah bad ka jingtbit ban ai jingshai sha ki paidbah halor kane ka bynta kaba donkam bha ha ka jingim khnang ba ki paidbah ki lah ban ïoh ïa ki jingmyntoi kiba donkam bad ba kin ym duh noh ïa ki lad bad ki kabu kumno ban im ïa ka jingim kaba don jingkyrmen namar ba ki tip ba ha kaba kut jong ka por kin ïoh ban kheit ai u soh uba bang bad lada kim lah ban ïoh da lade ruh ki longdien jong ki kin ym duh ïa kata ka lad.