Shillong, Ïaiong 16 : Hadien 18 snem ba u Abraham Khan 47 snem ka rta ba shong ba sah ha Mawtari, Myrdoh, Umsning Area, Ri Bhoi District u la pyni paidbah ïa ka sap ba kyrpang ba u lah ban bam bad ktha kumba ktha shana ïa ki bitor kum ïa u Bulb light bad ruh Tube light, ha kane ka kynti ruh une u rangbah u la mih biang shakhmat ban pynpaw ïa kane ka sap kyrpang kaba u don naduh ka por ba u dang don 29-30 snem ka rta ha u snem 2004 mynshuwa.
U Ahraham khan u dei u kurim jong i kong Metilda Muktieh bad u don 5 ngut ki khun, 4 ngut ki shynrang bad iwei i kynthei iba khatduh eh. u khun ba nyngkong u la don mynta 26 snem ka rta bad trei ha NEIGHRIMS bad i kynthei barit i dang 8 snem ka rta.
Ha shwa ba un pyni ïa katei ka sap ba kyrpang ba u don, utei u rangbah u la ïathuh ba man ka por u ju leh ïa katei ka kam bad kam pat ju don shisien ruh ka jingpyndik ïa ka met jong u.
Shwa kane, u la ong ruh ba um kwah satia ba ka sap kaba u don kan shu kut tang ha u ne ha i lympung ba u don hynrei u kwah ban pyni sha ka pyrthei ïa katei ka sap kyrpang kaba u Blei u la ai, kata ban bam bad ktha ïa ki kynja bitor kumba ktha shana.
“Kane kadei ka jingleh da ka mon sngewbha jongnga ban pyni sha ka pyrthei ïa kane ka sap. Nga tip bad tikna ruh ba kan ym don kano kano ka jingktah ïa ka met jongnga namar nga la ju leh barabor,” u la ong haba kren shwa ba un bam.
Shuh shuh u ong ruh ba ka daw kaba kongsan ba u la wan ban mih sha khmat ha kane ka kynti ka long namar ba u ong na haduh kitei ki snem haduh mynta um pat ïohi ban don mano mano hapoh ka jylla Meghalaya ne ka dong ka thaiñ kiba don ïa kane ka sap kaba phylla kaba u Blei u la ai ha u.
Ha kane ka jingpyni ha kane ka kynti u Abraham Khan u pyndonkam 2 tylli ki bulb light bad uwei u Tube light bad kum ka jingpyntngen u bam ruh ïa u salad bad dih ïa ka um. Hadien jong kane ka jingpyrshang u la pyni ruh ba kam don satia kano kano ka jingmih snam ka shyntur ne thut ka jingkoit jingkhiah, hynrei u long hi kumba ju long barabor.
Tangba, u kyntu pat ïa ki paidbah ba kim dei satia ban pyrshang ïa katei ka kam ha iing namar ïa kane lah ban leh tang kiba la tbit lane kiba don ïa kata ka sap kaba kyrpang ba la ai hi da u Blei.
