Shillong, ïaïong, 16: Ki shipai BSF 45 Battalion ha ka sngi Saitjaiñ ki la ïoh kurup palat 5000 hajar kilo u kwai kyrtong uba shongdor haduh T.11 lak ïa uba la khaii tuh sha India na ka ri Bangladesh.
Ki shipai BSF kiba pynlong ka jingtalasi kali ha ka shnong Dampukaphal kaba hap haoh ka PS- Rongra South Garo Hills ki la ïoh bat ïa ki ar tylli ki kali kiba kit ïa u kwai tyrkhong.
Ki nongniah jong kine ki ar tylli ki kali ki phet krad tang shu ïohi ïa ki shipai BSF bad iehnoh ïa kali bad ïa ki mar shadien.
Ïa u kwai ba la ïoh kurup ki shipai BSF ki la aiti noh sha ki Pulit jong ka Rongra Police Out Post ban leh ïa kaba donkam.
Ha kane kajuh ka sngi ki shipai BSF 4 Battalion ki la ïohkem ïa uwei u mynder na ka ri Bangladesh uba kit ïa ka pisa India kaba kot T.4 lak katba u dang thmu ban jam be-aiñ na u pud u sam jong ka ri India sha Bangladesh.
Ïa une u mynder, la ithuh kyrteng kum u Md. Iqbal Miah, 45 snem ka rta uba shong basah ha ka shnong Upsahar, Sylhet District.
Ïa une u mynder ki shipai BSF ki la ïoh bat hajan ka jaka shonglieng ha Dawki katba u dang thmu ban leit phai sha ka ri Bangladesh.
Ïa kane pisa ym pat lah satia ban lap ksai naei u ïoh bad mano ba donkti ban phah rah lyngba jong u. Ïa kane ka pisa bad ïa u Md. Iqbal Miah la aiti noh sha ki Pulit jong ka Dawki Police Station ban pynngat ha ki kyndon jong ka aiñ.
