Hadien 6 snem ïoh ka jylla niam Nongstoiñ ïa u Nongsharai, poi da ki lak ngut ha ka sngi kyntang ïa u Bishop Wilbert

Nongstoiñ, Iaiong 16: Hadien 6 snem ba ka jylla niam Nongstoiñ ba ka la shong khlem don u Bishop shuh uba long u nongsharai ba ha khliehduh jong ka, ha ka sngi u Blei ki paid riewngeit jong ka Balang Katholik jong kane ka jylla niam ki la ioh biang ïa u nongsharai ba pura jong ka da ka jingkyntang ïa u Lyngdohsad ba thymmai ka Nongstoiñ u Bishop Wilbert Marweiñ.
Ha kane ka sngi la sakhi ba da ki palat lak ngut ki paid riewngeit jong ka Balang Katholik na ki lai tylli ki jyllaniam ki la wan ban sakhi ïa kane ka jingpynkyntang Lyngdohsad ïa u Bishop Wilbert Marweiñ ïa kaba la pynlong ha Madan jong ka Parish St Peter’s Catherdar Parish Pyndengrei, Nongstoiñ.
Ïa ka jingpynkyntang Lyngdohsad ïa u Bishop Wilbert la pyndep da u Lyngdohsad jong ka jylla niam bah Shillong u Archbishop Victor Lyngdoh DD ha ryngkat ka jingdon lang u Archbishop John Moolachira jong ka jylla niam bah Guwahati, u Archbishop Dominic Lumon jong ka Imphal kum ki nongkñia jong ka Mass bakhuid ha ryngkat ka jingsynran lang kiwei pat ki Lyngdohsad bad ki lyngdoh na kiwei kiwei pat ki jylla niam na ka thaiñ Shatei Lam Mihngi ka ri ha ryngkat ka jingdon lang u nongmih khmat jong u Archbishop Leopoldo Girelli uba dei u nongmihkhmat jong u Pope sha India.
Haba pharia ïa ka ktien ka jong u Blei u Archbishop Victor Lyngdoh u la sngew la kraw ïa ki paid riewngeit ba kin kynmaw ïa u Bishop ba dang shu shah pynkyntang ha ki jingduwai jong ki bad kumjuh ïa u Bishop Wilbert ba un long barabor uba pyndem ïa lade ha ka jingduwai.
“To ai ba u Jisu Khrist ba la Mihpat un don ryngkat bad phi ha ka kam sharai ïa ki paidbah ba u la pynkhamti ïa phi bad kane ka kam shakri ba u Jisu u la pynkhamti ha phi ka long ka kam kaba khia bad kaba kyntang na bynta ka kam jingpynim,” u la ong.
“Ngi pdiang sngewbha ïa phi sha ka kynhun jong ki Bishop bad kum kiba u la jied ban shakri ym na ka bynta jong ngi hynrei na ka bynta ki paid jong u bad ka kyrdan Bishop ka dei ka kam shakri ym ka kyrdan,” u la bynrap.
“Nga la long tang u jynthaw barit eh jong u Blei bad ka jingjied jong u ïa nga ban shim ïa kane ka lyngkor kam dei namar ka jinglah jong nga ne ka jingkham tbit jong nga hynrei namar u la don ka saiñdur jong u ïa na ka bynta ka hima ka jong u ban pyndonkam ïa nga u shakri ba rit eh jong u,” ong u Bishop Wilbert.
Haba kren halor ka jingïaid lynti jong u kum u khynnah rit ba la kha ha Rangblang ha ka ïing ka sem kaba duk, u Bishop u la ïathuh ba naduh kaba sdang ka jingim leit skul jong u ka dei beit tang ki kam phylla kiba la jia ha ka jingim jong u.
“Nga la poi leit skul namar nga shu bud ïa ki para khynnah bad hadien ba nga la wai skul nga la leit ban sharai masi man ka sngi,” ïathuh u Bishop Wilbert.
“Naduh kaba sdang ka jingim ngam ju don jingthmu ban long Lyngdoh ban ong lei sha ka kam Bishop ka dei kaba ngam lah ban mutdur, ka jingpoi leit pule jong nga ha St Paul Seminary, Upper Shillong ruh ka dei beit namar nga kwah ban nangkren phareng namar nga iohi ba ki khynnah Seminary ynda ki wan shnong ki kren phareng ba ka jingleit rung jong nga ha St Paul ka dei beit thik tang ban nang kren phareng, bad kine kiba la jia ha ka jingim jong nga mynta ki dei beit tang ka saiñdur bad ka mon ka jong u Blei,” u la ong.
“Haba u Nuncio u la khot ha Delhi ban ïathuh ïa ka khubor ba u Pope Francis u la ibit ba ngan long u Bishop ngam sngew nang leh eiei shuh hynrei tang ka jingsngew kulmar jingmut hynrei nga tang shu plie ïa ka Baibyl nga shem ïa ka Psalm kaba ong Nga don hangne ban leh ïa ka mon jong me bad dei hadien ka jingduwai bad ka jingpuson kaba palat lai kynta ba nga nud ban shim ïa ka rai ban ong Hooid ïa ka jingtyrwa kaba u Pope Francis u tyrwa ïa nga,” la bynrap u Bishop.
U Archbishop Leopoldo Girelli haba kren hadien ba la dep ka jinglehniam pynkyntang Lyngdohsad, u la ñiewtang bad ai khublei ïa ki kam sharai jong ki Lynghdohsad kiba la donkti ban sharai ïa ka jylla niam Nongstoiñ ba kynthup ïa u Archbishop Victor Lyngdoh u Bishop ba nyngkong eh, hadien ïa u Archbishop Dominic Jala SDB u ba la long kum u Apostolic Adminsitrator kane ka jylla niam bad kumjuh ïa u Fr Anslem Nonglang uba la long u Diocesan Adminstrator na bynta lai snem hadien ka jingkhlad noh u Archbishop Dominic Jala.
“Phi la mad kum u nongsharai ha kiba bun ki bynta la ka kane ka ri ne wat shabar ruh bad ngi don ka jingngeit kaba skhem ba ki jingïaid lynti jong phi kan ïarap shuh shuh ban pynïar ïa ka hima u Blei,” ong u Archbishop Leopoldo Girelli ïa u Bishop Wilbert.
Ha kane ka sngi la sakhi ba ki nongïalam saiñ pyrtehi kiba bun ki la wan shim bynta sha kane ka jingpynkyntang Lyngdohsad ba kynthup ïa u Myntri Rangbah ka jylla u Conrad K Sangma bad kiwei kiwei ki myntri sorkar, ki MLA bad MDC, u DC ka West Khasi Hills u Bah Garod L.S.N. Dykes bad kiwei kiwei ki kynrem ki lyndan.
Lah ban kdew hangne ba ïa ka jylla niam Nongstoiñ la sdang ha u snem 2016 bad la pynkhamti ha u Archbishop Victor Lyngdoh kum u nongsharai hynrei ha u snem 2016 u Pope Francis u la pynkynriah noh ïa u Archbishop Victor Lyngdoh sha Jowai Diocese bad hadien kane la ïarap ban sharai ïa kane ka jylla niam da u Archbishop Dominic Jala tad haduh ba un da khlad noh ha u snem 2019 bad hadien kane la shimti da u Sohblei Anselm Nonglang kum u Diocesan Administrator ban peit ban khih katba ym pat ioh ïa u nongsharai pura bad dei ha ka 5 tarik Rymphang 2022 ba la thung Bishop ïa u Sohblei Wilbert ha kato ka por bad la pynkyntang kum u Bihsop ha ka sngi u Blei.