Husiar lada bakla rai kan ktah ïa ka jingsngew ki Khasi, Jaiñtia bad Garo: Geroge

Shillong, Ïaiong 16 : U Vice President ka Trinamool Congress, u Bah George Lyngdoh u la maham lypa ba kano kano ka jingshim rai bym dei halor ka State Reservation Policy ka lah ban wallam pynban ïa ka jingbymsngewthuh jingmut hapdeng ki Khasi – Jaiñtia bad Garo.
Utei u MLA barim ka Umroi u la ong ruh ba ka Reservation Policy kadei ka ishu kaba khluit bha namar kadei ka bynta kaba ktah ïa ka jingangnud bad ka lawei jong ki samla ka jylla.
“Kumta, kano kano ka sienjam kaba bakla ha kane ka phang kaba khia bha ka lah ban wallam ïa ka jingsngew kaba ïapher bad ka jingbym sngewthuh jingmut kaba lah ruh ban ktah ïa ka jingïadei kaba la don slem hapdeng ki Jaidbynriew bapher bapher kiba don ha ka jylla,”u la ong.
Shuh shuh u ong ruh ba kum ki nongthaw aiñ bad ki nongïalam ki dei ban buh hakhmat ïa ka jingsngew bad ruh ka jingdonkam ban buh ruh ïa ka shongsuk hakhmat eh hapdeng ki lai tylli ki Jaidbynriew. “Kam dei satia ban wan kano kano ka jingpynthut ïa ka suk ka saiñ ha ka kyrteng jong ka lawei ki khun samla. Kano kano ka policy kadei ban wallam ïa ka suk ka saiñ bad ka jingbym shah liang.”
Haba kren pat halor ka jingpyntreikam ïa ka roster system, utei u MLA barim u la buh jingkylli ïa ka rai jong ka sorkar ban pyntreikam ïa ka Roster da kaba phai shadien. U ong ruh ba ka sorkar kadei ban pynsngewthuh ïa ki paidbah balei ba la pyntreikam da ka phai shadien bad ym dei da kaba ïaid nangne shakhmat.
U kynnoh ruh ba don ki Myntri Sorkar ki bym sngewthuh ruh shaphang ka Roster System bad ong, “Na kaei kaba nga ïohsngew na ka jingïakren, kadei ba don na ki nongthaw aiñ, bad ki Myntri Sorkar kiba don ha ka kynhun Myntri kiba ym pat lah ban sngewthuh shaphang ka roster system. Mynta ki la buh ïalade ha ka jaka baki hap bansngewthuh ïa ka bad ruh ban sngewthuh ïa ka jingpyntreikam shadien bad ka jingpyntreikam ia ka shakhmat.”
Katkum ka jingong jong u, donkam ïa baroh ki sengsaiñpyrthei ban ai jingmut lang. U ong ruh ba haman la ki policy kin don ki kynhun kiban kyrshan bad don ruh kiban pyrshah, kumta u ong ba lada donkam ban pynbeit ia ka, hap ban da bishar bniah bha da kaba buh hakhmat ïa ka jingkhmih lynti bad khamtam eh ka jinglong jingman ha ka jylla.
Shuh shuh u la ong ruh ba wat ka Riti Synshar jong ka Ri la dep ban pynbha bunsien namar ka donkam ban sngap ïa ka jingangnud jong ki paidbah.