Kam pat don ka jingshim rai ha ka CEC ba ngin leit rung noh sha ka NPP : Banteidor Lyngdoh

Shillong, Iaiong 16: Da kaba pynpaw ka jinglyngngoh halor ka jingmih khubor ba baroh ar ngut ki MLA ka People’s Democratic Front (PDF) kin leit ïasoh noh sha ka National People’s Party (NPP), u Bah Banteidor Lyngdoh, MLA ka PDF na Mawkynrew u la ong ba kine kiei kiei kim shym la mih na ki kum ki trai.
U la ong ba la bun bha kiba batai stad bym ithuh ithaw shuh ba kan don sa ka elekshon shiteng samoi na Mawkynrew bad na Sohra. U la ong ba kum kine ki kam ki dei ki kam iap kam im bad khlem da ïoh ban ïakren ne ïa pynbeit kan nym lah ban long kumta.
Da kaba ong ba kin shong ka jingïalang Central Executive Committee (CEC) ban ïakren halor kane, u la ong ba yn da dei ka por kaba biang kin sa paw kiei kiei baroh bad ka shong ha ka jingpynbeit bad jingïakren.
U la ong ba ka National People’s Party naduh ka sngi ba pynbna ïa ka result elekshon ka la khot ïatreilang hynrei ma u bad u Bah Gavin M Mylliem, MLA ka Sohra ki la ïaishah bad bat ïa ka kular ba ka seng riewlum kan ïalam ïa ka Sorkar.
U la ong ba dei ka PDF kaba leit khatduh ban ïatreilang ban thaw ïa ka Sorkar MDA II bad ym dei ba ki kwah shuki ne rhah bor. U la ong ba ka shong ka jingiakren ha ka Central Executive Committee (CEC) khnang ba kano kano ka jingthmu kan long na ka bynta ka jingbit jingbiang lang jong baroh.