Shillong, Iaiong 16 : U MP ka Shillong Parliamentary Constituency u ma Vincent H Pala uba dei ruh u President ka Meghalaya Pradesh Congress Committee (MPCC) u la ai ka jingïaroh ïa u Symbud Myntri Rangbah ka jylla uba dei peit ruh ïa ka tnad Kam Pohïing u bah Prestone Tynsong ba u la lah ban pynkut bad pynduh jait ïa ki “High Level” kiba donkti ha ki kam khaïi tuh ïa u dewiong ha ka jylla.
“ Nga ai ka jingïaroh ïa u bah Tynsong uba la pynkylla ïa ka kyntien “High Level” sha ka “Zero Level” kumba long haduh mynta. Namar naduh ba u la shimti bad peit ïa ka tnad kam pohïing kata ïa ki pulit ym don shuh kita ki High Level khaïi dewiong beain” ong u ma Pala.
“ Ki briew kiba ïa khaïi dewiong ki la ïathuh ïa nga ba ym don “ High Level” shuh naduh ba la shimti da u bah Tynsong ïa ka tnad kam pohïing namar u la pynduh jait ïa ki high level. Kumta ngam kwah ban shu kynnoh khlem ki nongrim namar nga tip shisha tang shu dep shimti u bah Tynrong baroh ki high level ki la kut lut hapoh ka jylla” ong biang u ma Pala.
U la ong shuh shuh ba kine ki kam beaiñ kim long shuh kum mynshwa ha kaba wat ka sorkar ruh ka ïadon kti lang.
“ ïa mynta hi kine ki kam beaiñ ki la duna shi katdei eh namar mano hi ban ïa kwah leh beaiñ haba ïa ki challan ruh la ai na ka bynta ban shalan ïa u dewiong na ka jylla” ong u ma Pala.
U la ïathuh shuh hsuh ba mynta ki nongkhaïi dewiong ki khaïi beit ïa u dewiong ryngkat ki kot ki sla kiba biang namar ïa u dewiong la lilam da ka Coal India Limited (CIL)).
“ Kiba bun ki paralok jong nga kiba leh ïa ki kam khaïi dewiong mynta ki shalan dewiong beit ryngkat ki kot ki sla bad ki challan bad mynta wat ki karkhana tylliat dewbilat ruh ki thied ïa une u dewiong hi. Ki la ïathuh ba une u dewiong uba kit mynta u dei uba lilam shisha da ka CIL um dei uba khaïi beaiñ” ïathuh u ma Pala.
Halor ka jingbthah ka ïing bishar High Court ban buh 10 pyrton ki kynhun pahara ka sorkar pdeng CAPF ban tehlakam ïa kane ka kam khaïi dewiong beaiñ ha ka jylla u ma Pala u la ong ka donkam ka jingiatrei lang jongka sorkar jylla lym kumta ym don jingmyntoi lada wanrah da ki CAPF ruh.
“ Lada phah ïa kita ki CAPF bad kam don jingmyntoi lada ka jingïatrei lang jongka sorkar jylla kam don namar kaei kaba kongsan ka dei ka jingïatrei lang jongka sorkar jylla” ong u ma Pala.
Lada ka long kumba long mynta wat tang ki bor pulit ruh ki la lah ban tehlakam ïa kine ki kam beaiñ ba la leh baroh shi katta.
