Kular u MR ban bud dien sha Delhi ban pyntreikam ïa ka Reservation Policy ha ki skul EMR

Shillong, Rymphang 23 : U Myntri Rangbah ka Jylla Conrad K Sangma ha ka sngi Thohdieng, ula ong ba ka Sorkar Jylla ka la buddien bad ka Sorkar Pdeng ha ka ban pyntreikam ïa ka Reservation Policy hapoh ka Eklavya Model Residential Schools (EMRS) hapoh ka jylla
Haba jubab ïa ka mat ïatai ba la wanrah da u MLA ka VPP na Nongkrem, u Conrad ula ong ba ha ka jingïakynduh, u Myntri ka Tribal Affairs ula pynpaw ba yn sa mynjur ïa ka jingpyn treikam ïa ka Reservation Policy ha ki skul EMRS kiba don hapoh ka jylla.
“Hooid, ngi khlem ïoh jingkular da ka jingthoh. Kumta, ngi dang buddien ïa kane ka kam bad ka Sorkar Pdeng, namar da ki hajar ki kam kin mih da ka jingseng ïa ki skul EMRS” ula ong.
Hynrei u Myntri Rangbah ula ong ba ka jingpynsangeh ïa ka jingïaid ka jingtrei ka lah ban ktah ïa ka kam ha ka jingïakren jong ka Sorkar Jylla bad ka Sorkar Pdeng.
Shuwa kane, haba jubab ha ka kynta kylli jingkylli halor kane kajuh ka kam, u Myntri ka Tnad Pule Puthi Rakkam A Sangma ula ong ba ka Reservation Policy kan ym treikam satia ha ki skul EMRS. “Hynrei, ngin sa buddien ïa ka kam bad ngi la dep thoh la ka Reservation Policy ka lah ban treikam ne em tangba ngim pat ïoh jubab na ka Sorkar pdeng”.
Haba jubab bynrap, u Myntri Rangbah ula pyntip ba ula dep ïakren bad u Myntri ka Tnad Tribal Affairs ba ka jingpyntrei ïa ki EMRS hapoh ka Jylla ki long kiba ïaid suki bha.
Ula ai jingmut ia u Myntri halor ka jingdonkam ban ailad ïa ka Sorkar Jylla bad ïa ki agency jong ka, ba kin pyntrei ïa ki project namar kan kham bha shibun khamtam ha ka ban weng ïa ki jingeh ba ïakynduh bad ki trai shnong.
ïa mynta, ki project ki dei kiba la pyntrei da ki artylli ki agency ba la jied da ka Sorkar Pdeng lyngba ka jingkhot tender.
“Kumta, ngi dang ïai bteng ban buddien ïa kane ka kam bad ngi kyrmen ba ngin ïoh ïa ka jubab kaba bha” ong u Conrad.
Halor ka jingslem ban pyndep ïa ki jingtei jong ki EMRS, u Myntri ula ong ba ka jingpyntrei ïa ki project ha kiba bun ki block ka long kaba jynjar bha namar ka jingeh ha ka jaka khamtam ba don ka kyndon jong ka Ministry ba ong ba ïa ka jaka dei ban ai ei khlem kano kano ka jingsiew.
“Ka jingeh ban ïoh jaka ka dei kaba don ha kiba bun ki block. Hadien ka jingïalang bishar kam, ngi la lah ban ïohi ïa katto katne ki sngi kiba la sdang pyntrei bad ngi khmih lynti ba yn pyndep noh kloi ïa ki” ula bynrap.