96.72 lak tyngka siew ka sorkar sha kiba iap shah bat bording electrict ha ki 10 snem

Shillong, Rymphang 23 : Ka sorkar ka la siew bailutksan haduh 96,72,640 lak tyngka sha kito baroh kiba la iap shah bat bording ilektrik ha kine ki 10 snem ba la leit noh.
ïa kane la pynpaw ha ka jubab jong u myntri ka tnad pynmih bording ka jylla u Abu Taher Mondal ba la wanrah hapoh ka ïing Dorbar Thaw Aiñ ka jylla.
Haba batai kumno ba kito kiba ngat ha ka apot ki ïoh ïa kane ka jingsiew na ka tnad pynmih bording u Mondal u la ïathuh ha ka jubab ba hadien ba la ïoh jngtip halor ka jingjia mar mar u Assistant Executive Engineer uba dei peit u leit sha ka jaka ba la jia ban jurip da lade kumno ka jia bad hadien kane un sa ai ïa ka kaiphod halor ka jingjia sha u Senior Electrical Inspector bad ujor ruh da ka ejahar ha ka Police Station ba ka jaka ba jia ka hap. Nalor kane la pyntip ruh sha ki Deputy Commissioner bad ki Superintendent of Police jong ki district ba ka jingjia shah bat bording ka jia.
Hadien kane na ka liang u Senior Electrical Inspector un tohkit bniah ban lap ïa ka daw ba shah bat bording bad pynkhreh ïaka kaiphod ban ai sha ka Meghalaya Energy Corporation Limited ryngkat ki jingai jingmut. Ka dor ban siew bailutksan kan long kat kum ka jingpynbna ba la dep pynbna da ka tnad pynmih bording jongka jylla.