Thrang ka sorkar ban pynkylla 1 lak hectare ka jaka rep ban rep khlem ai dawai sboh

Shillong, Rymphang 23: Ka Myntri ka tnad kam rep kam riang ha ka jylla ka Dr Ampareen Lyngdoh mynta ka Sngi Thohdieng ka la pyntip ba ka Sorkar Jylla ka don jingthrang ban pynkylla ïa palat 1 lak hectare ka jaka ban rep khlem ai dawai sboh kat kum ka Meghalaya State Organic Mission 2024-2028.
Haba jubab hapoh ïing Dorbar, ka Dr Ampareen ka la ong “Ka Meghalaya State Organic Mission 2024-28 ka dei kaba la thaw bad pyllait ha ka 15 tarik Rymphang 2024, da ka thong ban pynkylla palat 1 lak hectare ka jaka kum ka jaka rep ba khlem ai dawai sboh hapoh ka National Programme for Organic Production (NPOP).
Ka pyntip ba hynriew ngut ki service provider la ithuh ban pynkloi ïa ka jingai syrnod bad pyntreikam ïa ka mission.
Ka pyntip ruh ba la dep ban thaw ïa ka Organic Society ba la ai kyrteng ka Meghalaya Natural and Organic Society for Livelihood and Innovation in Agriculture (MEGNOLIA) ka ban pyntreikam ïa ki prokram rep khlem ai dawai sboh hapoh ka Jylla.
Ka Sorkar Jylla ha u snem ba la lah, ka la wanrah ïa ka Meghalaya State Organic and Natural Farming Policy 2023.