Shillong, Naiwieng 04: Ka Hynñiewtrep Integrated Terrestrial Organiza-tion(HITO) ha ka sngi Thohdieng ka la leit ban kynduh ïa u Lamphang ka jylla u Bah Metbah Lyngdoh ban dawa ba un khot ïa ka dorbar kyrpang ba ka sorkar kan ïoh ban wanrah ïa ka aiñ rew ba ka Ïing Dorbar Thawaiñ kan ïoh ban mynjur ban pyndam noh ïa ka Meghalaya Regulation of Gambling Act 2021 namar na ka liang ka HITO kam ïahap ban pyndam tang da ka Ordinance.
Haba kren sha ki lad pathai khubor u Bah Donbok Dkhar u la ong ba ba na ka liang u Lamphang u la kular ba un sa shim khia ïa kane ka mat bad ïathuh ba u Lamphang u la kular ban ïakren bad ka sorkar halor kane ka jingdawa ka HITO ban pynlong da ka dorbar kyrpang.
Haba jubab halor ka daw ba kim hun wat hadien ba ka sorkar ka la kular ban pyndam ïa kane ka aiñ da ka Ordinance, u Bah Donbok u la ong ba namar bunsien kaei kaba ka sorkar ka kren ka leh pat mar khongpng ,namarkata, ba tang lada ki wanrah ïa ka aiñ ka HITO ka lah ban ngeit.
Haba jubab la kane ka jingdawa jong ki ka dei ïoh ba ki tieng ïoh kane ka sorkar kan wan biang ha ka bor bad ïoh kim pyndam ynda la kut ka 6 bnai, u Bah Donbok u la ong, “Ban ong ba kan wanphai ne kam wanphai ym don mano mano ban lah ban ong hynrei tang u paidbah bad lehse lada ka dei shisha kumba phi ong ba kin wan biang sha ka bor, ïoh lehse kin wanrah beit da ka bor ïa ka casino namarkata ngim lah ban shu ïakhih bad sahngeh noh mynta shipor bad hap ïakhih biang pat baroh saw san snem hynrei ngi kwah ba ngin ïakhih mynta bad urlong ka jingïakhih bad ngim donkam ïakhih shuh hadien.”
Haba kylli la na ka liang ka seng ki buh por ïa kane ka jingdawa u Bah Dobok u la ong ba na ka liang ka HITO ka ai por ba ka dei ban urlong shuwa ban pynlong ïa ka Tamasa Cherry Blosom hynrei lada kam urlong u la ong ba ka seng ka pynlong hi noh syndon ïa ka Casino ha kane ka tamasa bad kan pynthut ruh ïa ki prokram jong kane ka tamasa ka sorkar.
U la ong ruh ba ka sorkar ha ka jingshisha kam dei ban pynsyrwa kai ïa ka pisa u paidbah ha ki tamasa namar ka dei tang ka kam lutphut haduh 14 klur na ka pisa u paidbah.
“Ka sorkar ha ka jaka ban pynlut ïa ka pisa ha ka tamasa bym ai jingmyntoi ïa u paidbah ka dei ban siew noh ïa ki scholarship ki samla pule ne siew tulop ïa ki nongtrei ka koit ka khiah kiba lah ban duh tulop kumba la mih ha ki lad pathai khubor” u la ong.
